साताको अन्तिम कारोबार दिन बिहीबार नेप्से परिसूचक दुई वर्ष ३ महिनाअघिको विन्दुमा प्रवेश गरेको छ ।
नेप्से परिसूचक २४०० विन्दू माथि पुगेको छ । बुलिस ट्रेण्ड समातेको बजारमा बिहीबार कारोबार सुरु भएको २६ औ मिनेटमा २४०० को उचाई चुमेको हो ।
अहिले बजार केही करेक्सन भई अगाडि बढेको छ । यो समाचार तयार पार्दासम्म ३५.३८ अंकले बढेर २४०० को विन्दूमा बजार घुमिरहेको छ ।
कारोबार रकम पनि कारोबार शुरुवात भएको गेढ घण्टामै ५ अर्ब रुपैयाँभन्दा बढीको शेयर कारोबार भएको भइसकेको छ । असार १५ गतेदेखि बजार निरन्तर बढीरहेको छ ।कतिपय लगानीकर्ताले यतिबेला बुल रनमा प्रवेश गरेको बताउन थालेका छन् । नेपाल राष्ट्र बैंकले शुक्रबार मौद्रिक नीति पनि ल्याउँदै छ ।
आँखु खोला जलविद्युत कम्पनी, उपकार लघुवित्त र मेरो माइक्रोफाइनान्सको सेयरमूल्यमा अपर सर्किट समेत लागिसकेको छ र यो समाचार तयार पार्दाको समयसम्ममा ७ वटा कम्पनीको शेयरमूल्यमा सकारात्मक सर्किट लागेको छ । यसरी सर्किट लाग्ने कम्पनीमा अधिकांश लघुवित्त र जलविद्युत छन् ।
साताको अन्तिम कारोबार दिन बजारमा उत्साहको अवस्था देखिएको छ ।
कांग्रेस एमाले गठबन्धनमा सरकार बनेसँगै राजनीतिक स्थायीत्वको आशा, सेयर बजारमैत्री विष्णु पौडेलको अर्थमन्त्रीको रुपमा पुनरागमन, बैंकको निरन्तर घट्दो ब्याजदर र लगानी तथा बजारमैत्री मौद्रिक नीति सार्वजनिक हुनेमा ढुक्क भएका लगानीकर्ताहरुले उत्साहपूर्ण ढंगले बजारमा सहभागिता जनाइरहेका छन् ।
नेप्से परिसूचक यसअघि २०७९ बैशाख ११ गते २४२० अंकमा रहेको थियो । त्यसपछि हालसम्म २४०० माथिको विन्दू चुम्न सकेको थिएन ।
यसरी हेर्दा नेप्से परिसूचक करिब २७ महिनापछि २४०० विन्दू माथि पुगेको हो ।
यो दिन माइक्रोफाइनान्स, विकास बैंक र बैंकिंग समूहमा विशेष आकर्षण देखिएको छ ।
