बिशाल आवाज : ख्यङ्साङ्नाम्दो किम्हे युनाईटेड महिला एफ सी ,नेपाल महिला फुटबल परिवार सेतो लाई २-० ले पराजित गर्दै दक्षिण कोरियाको दक्षिणी भाग किम्हेमा आयोजित “प्रथम गिम्हे युनाइटेड महिला फुटसल कप” चुम्न सफल भएको छ।
“विदेशी भूमिमा सङ्घर्षको क्रममा, रमाउ हामी फुट्सलको गोलमा। दक्षिण कोरियामा रहेर खेल दौरान घाइते खेलाडी उद्धार सहयोगार्थ” किम्हेमा गिम्हे युनाइटेड एफ.सिले आयोजना गरेको “प्रथम गिम्हे युनाइटेड फुटसल कप” मा यसपाली ३ महिला टिम पनि सहभागि रहेको थियो । ख्यङ्साङ्नाम्दो किम्हे युनाईटेड महिला एफ सी सहित नेपाल महिला फुटबल परिवार सेतो र नेपाल महिला फुटबल परिवार निलो गरी ३ टिम सहभागि प्रतियोगितामा सेतो ले बाइ पाएर सिधै फाइनलमा प्रवेश गरेको थियो । यसैगरी किम्हे युनाईटेड महिला एफ सी र नेपाल महिला फुटबल परिवार निलो बिच भएको सेमिफाइनलमा किम्हे युनाईटेड महिला एफ सी का जर्सी नम्बर १४ को खेलाडी डोल्मा योन्जन तामाङले सेकेन्ड हाफ पछी २ गोल गर्दै निलो लाई २-० ले पराजित गरी फाइनलको ढोका खोलेका थिए ।
एक म्याच अगाडि नै बाइ पाएर फाइनल पुगेको पूजा क्षत्रिको सेतो टिमलाई परी गुरुङ क्याप्टेन रहेको किम्हे युनाईटेड महिला एफ सीका डोल्मा योन्जन तामाङ र शर्मिला थोकरले सेकेन्ड हाफ पछी नै १/१ गोल गरी २-० ले पराजित गर्दै ट्रफी चुम्न सफल भए । यसैगरी प्रतियोगिताको बेस्ट प्लेयर ,बेस्ट किपर किम्हे युनाईटेड महिला एफ सी कै क्रमश: डोल्मा योन्जन तामाङ र आशा लामा हुन सफल भए । प्रतियोगितामा विजेता टिम र उपविजेता टिमले आकर्षक ट्रफी र प्रमाण पत्र प्राप्त गर्न सफल भए ।
पछिल्लो समय दक्षिण कोरियामा पनि महिलाहरुमा फुटवल प्रतिको अभिरुचि उल्लेख्य मात्रामा बढेको छ। महिला फुटसल टिम बनाएर प्रतियोगिता हरुमा सहभागि गराउने भनेर सुरुवात गरेको छोटो समयमै ५० जना भन्दा धेरै महिला खेलाडी जम्मा भैसकेको नेपाल महिला फुटबल परिवार दक्षिण कोरियाको सयोजक डा. कमला ओली साउदले बिशाल आवाज लाई बताउनु भयो ।
