गैरआवासीय नेपाली संघ, राष्ट्रिय समन्वय परिषद् (NRNA–NCC) दक्षिण कोरियाले सातौं पूर्ण बैठकमार्फत संरचना सुदृढ गर्दै आगामी २०२५–२७ कार्यकालका लागि संरक्षक, सल्लाहकार तथा कार्यसमितिका रिक्त पदहरूमा पदपूर्ति गरेको छ।
संघको विधानअनुसार संरक्षक, वरिष्ठ सल्लाहकार, सल्लाहकार र कार्यसमितिका महिला उपाध्यक्ष तथा सदस्य पदमा नयाँ नियुक्ति गरिएको हो।
संरक्षकमा डा. प्रकाश धमाला र लक्ष्मी लामा गुरुङ, वरिष्ठ सल्लाहकारमा जीवन खतिवडा, गिरिराज कुवंर र डा. अग्नि राज कोइराला, सल्लाहकारमा गम्भिर श्रेष्ठ नियुक्त भएका छन्।
त्यसैगरी कार्यसमितिको रिक्त पदमा महिला उपाध्यक्षमा हेमलता शर्मा र सदस्यमा ओम प्रकाश पुन चयन भएका छन्।
संघले नियुक्तिहरूलाई समाज, समुदाय र एनआरएनए अभियानप्रतिको योगदानका आधारमा मूल्याङ्कन गरेर जिम्मेवारी तोकिएको जनाएको छ।
महासचिव अजय सोडारीका अनुसार, “संघले विगतमा योगदान पुर्याएका व्यक्तिहरूलाई उच्च सम्मानका साथ नियुक्ति गरेको हो। नयाँ पदाधिकारीहरूले आगामी कार्यकालमा संघलाई नयाँ उचाइमा पुर्याउनेछन्।”
संघले नयाँ नेतृत्वको अनुभव र दृष्टिकोणले कार्यसञ्चालनलाई अझ प्रभावकारी, पारदर्शी, उत्तरदायी र सशक्त बनाउन सहयोग गर्ने विश्वास व्यक्त गरेको छ। साथै, आगामी कार्यकालमा दीर्घकालीन योजना तथा कार्यक्रमहरूलाई सफलतापूर्वक कार्यान्वयन गर्दै गैरआवासीय नेपाली समुदायको हितमा योगदान पुर्याउने अपेक्षा गरिएको छ।
