विशाल आवाज: हाल नेपाली बक्स अफिसमा सुनामी ल्याउन सफल अभिनेता विराज भट्ट निर्देशित ब्लकबस्टर फिल्म ‘१२ गाउँ’ दक्षिण कोरियाको गजेदोमा पनि नोभेम्बर २ तारिख शनिबारका दिन साँझ ७ बजे प्रदर्शन हुने भएको छ।
नेपालमा प्रदर्शनको दश दिनमै १० करोड माथि कमाइसकेको ब्लकबस्टर फिल्म ‘१२ गाउँ’ दक्षिण कोरियाको गजेदोमा पनि शुभ दीपावली तथा तिहारको पावन अवसर पारि हान्वा ओसन नेपाली एकता समाज दक्षिण कोरियाले प्रदर्शन गर्ने भएको हो। हान्वा ओसनमा कार्यरत नेपालीहरूले गजेदो स्थित गजे थेहाक्यो (거제시 마전1길 91-거제 대학교 정보관D104호) मा नोभेम्बर २ तारिख शनिबारका दिन साँझ ७ बजे देखि “अशक्त, अनाथ तथा विपन्न वर्ग लक्षित शैक्षिक सहयोगार्थ” चलचित्र ‘१२ गाउँ’ गजेदोमा प्रदर्शन गर्न लागेको हो। लुम्बिनी रेस्टुरेन्ट एण्ड बार अगाडि बाट हल सम्म जान र फर्कनको लागि बसको समेत व्यवस्था गरेको ‘१२ गाउँ’ चलचित्र हेर्न दर्शकले सहयोग स्वरूप २५००० वन दिनुपर्ने आयोजकले जनाएको छ।
“हाम्रो चाहना प्रवासी एकता र सद्भावको कामना”भन्ने मूल नाराका साथ सन् २०१६ मा स्थापित हान्वा ओसन नेपाली एकता समाज दक्षिण कोरियाले आफ्नो स्थापना कालदेखि नै विभिन्न सङ्घसंस्थासँगको सहकार्यमा दक्षिण कोरिया लगायत नेपालमा समेत निरन्तर रूपमा समाजिक तथा परोपकारी गतिविधि गर्दै आइरहेको छ। शुभ दीपावलीको पावन अवसरमा नोभेम्बर २ तारिख साझ ७ बजे प्रदर्शन गर्न लागेको चलचित्र ‘१२ गाउँ’ हेरेर मनोरञ्जनसँगै सामाजिक कार्यमा पनि हातेमालो गरेर सहकार्य गर्नुहुनका लागि गजेदो बासि सम्पूर्ण नेपाली दाजुभाई तथा दिदीबहिनीहरूमा आयोजकले हार्दिक अनुरोध समेत गरेको छ।
विराज र समीर पहिलो पटक एकसाथ देखिएकाले फिल्ममा पूर्व ‘मिस नेपाल इन्टरनेशनल’ न्यान्सी खड्का, मोडल सनिशा भट्टराई, दीया मास्के, अर्जुन जंग शाही, कनिज कोइराला, नरेन खड्का, कृष्ण भट्ट, सोनु चन्द्रपाल, कालु राना, शुलेमान शंकर ‘इकु’, भिष्म जोशी, स्टन्ट सिल्भा (साउथ फिल्मका कलाकार) लगायतको पनि अभिनय देख्न सकिन्छ ।
फिल्ममा महेश पौडेलको छायांकन, अर्जुन पोखरेल र निरज सिंहको संगीत, रामजी लामिछाने र सुनिल क्षेत्रीको कोरियोग्राफी तथा प्रवीन केएल र भुपेन्द्र अधिकारीको सम्पादन रहेको छ भने विराज स्वयंको कथा र सन्तोष सरकारको पटकथा तथा संवाद लेखन छ । यसमा द्वन्द्व निर्देशन साउथका स्टन्ट सिल्भाले गरेका छन् । उनले साउथका ५० बढी फिल्ममा द्वन्द्व निर्देशन गरिसकेका छन् ।
