सत्तारुढ पिपुल पावर पार्टी (पीपीपी) का नेता हान दोङ-हुनले संसदीय निर्वाचनमा भएको हारको जिम्मेवारी लिन बिहीवार राजीनामा दिएका छन् ।
बर्तमान राष्ट्रपति युन सुक-योलका विश्वासपात्र हानले डिसेम्बरको अन्त्यदेखि पीपीपीको चुनावी अभियानको नेतृत्व गरिरहेका थिए l तर बुधवार सम्पन्न संसदीय चुनावमा आफ्नो पार्टीलाई बहुमत ल्याउन उनि असफल भएका छन l
सत्तारुढ पीपुल पावर पार्टीका अन्तरिम नेता हान दोङ-हुनले बिहिवार पश्चिम सियोलमा रहेको पीपीपीको मुख्यालयमा आयोजित पत्रकार सम्मेलनमा आफ्नो राजीनामाको घोषणा गरेका हुन l राजिनामा घोषणा गर्दै नेता हानले भने “म हाम्रो पार्टीको तर्फबाट जनतासँग माफी चाहन्छु, हामीले जनताको समर्थन प्राप्त गर्न असफल भयौं,”
प्रमुख प्रतिपक्षी दल डेमोक्र्याटिक पार्टी (डीपी) ले प्रत्यक्ष प्रतिस्पर्धा गरेको २५४ सिटमध्ये १६१ सिट जितेको छ भने पीपीपीले ९० सिट मात्र जितेको छ । समानुपातिक सहित, डिपीले १७५ सिट प्राप्त गरेको छ भने पीपीपी १०८ सिट मात्र प्राप्त गर्न सफल भएको छ l
दक्षिण कोरियामा राष्ट्रिय सभाको कुल ३०० सिटको लागि बुधवार आम निर्वाचन सम्पन्न भएको थियो l
