बिशाल आवाज— नेपाली मौलिक संस्कार, संस्कृति तथा सनातन परम्पराको संरक्षण, संवर्द्धन र प्रवर्द्धन गर्ने उद्देश्यले स्थापित “सनातन, साहित्य, सङ्गीत, साधना समूह (पाँच स) दक्षिण कोरिया” ले यस वर्ष पनि आफ्नै मन्दिरमा पवित्र श्रावण महिनाको अवसरमा विशेष धार्मिक तथा सांस्कृतिक कार्यक्रमको आयोजना गर्ने भएको छ।
समूहले आगामी श्रावण १८ गते, आइतबार (२०२५ अगस्ट ३ तारिख) का दिन “रुद्राभिषेक तथा शिव महिमा भजन प्रतियोगिता” कार्यक्रम आयोजना गर्ने जानकारी दिएको छ। कार्यक्रम बिहान ९:३० बजे रुद्राभिषेक पूजाबाट सुरु हुनेछ भने भजन प्रतियोगिता बिहान ११:५० बजे सुरु हुने जनाइएको छ।
समूहले समस्त सनातन प्रेमी महानुभावहरूलाई कार्यक्रममा सहभागी भई पुण्य लाभ लिनुहुन हार्दिक अनुरोध गरेको छ। साथै, रुद्राभिषेक पूजा समारोहमा कर्ताका रूपमा सहभागी हुन इच्छुक महानुभावहरूले पूर्व जानकारी गराई नाम दर्ता गराउन सक्नेछन्।
भजन प्रतियोगितामा सहभागिता जनाउन चाहने टोलीहरूले पूर्वदर्ता अनिवार्य रूपमा गराउनु पर्नेछ। दर्ता शुल्क १ लाख कोरियन वोन तोकिएको छ र प्रत्येक टोलीमा कम्तीमा ५ जना सदस्य अनिवार्य हुनुपर्नेछ।
🎶 भजन प्रतियोगिताका आकर्षक पुरस्कारहरू यसप्रकार छन्:
- प्रथम पुरस्कार: ४ लाख ५ हजार कोरियन वोन + प्रमाणपत्र
- दोस्रो पुरस्कार: २ लाख ५ हजार कोरियन वोन + प्रमाणपत्र
- तेस्रो पुरस्कार: १ लाख ५ हजार कोरियन वोन + प्रमाणपत्र
धार्मिक आस्थासँगै नेपाली कला, संस्कृति र साहित्यको प्रवर्द्धन गर्ने उद्देश्यले समुहले विगत वर्षहरूमा पनि बिभिन्न कार्यक्रम हरु गर्दै आइरहेको छ।
थप जानकारी वा सहभागिताका लागि आयोजक समूहसँग सम्पर्क गर्न सकिनेछ।
