बोम्जन गुरुङ :नेपाली साहित्य जगत अन्तर्गत उपन्यासको क्षेत्रमा एउटा कृति थपिएको छ । पोखरा घर भई हाल दक्षिण कोरियामा कार्यरत राजेश सुवेदीले “अभिसार” नामक उपन्यास नेपाली साहित्य बजारमा ल्याएका छन् । उक्त उपन्यासको विमोचन यही आउँदो मे ४ तारिख आईतबार कोरिया सुवन स्थित उरी हिमालयन रेष्टुरेन्ट हलमा बिहान ११ बजे हुने भएको हो ।
अन्तर्राष्ट्रिय नेपाली साहित्य समाज दक्षिण कोरिया र मुक्तक प्रतिष्ठान दक्षिण कोरियाको संयुक्त आयोजनामा हुन लागेको उक्त विमोचन कार्यक्रममा आर एन अधिकारी वक्ता रहनेछन् भने रचनावाचनमा सरोज भण्डारी (कविता), शंकर नेपाल (गजल), रोदुङ यायावर (मुक्तक) रहने जनाईएको छ ।
भरतमुनिद्धारा रचित नाट्यशास्त्रमा उल्लिखित सप्तनायिकामध्ये सुन्दर अभिसारिकाले आफ्नो प्रियतमलाई भेट्न गरेको कठिन यात्रालाई अभिसार भनिएको छ । अभिसार आफैंमा ठूलो जोखिम हो । यो उपन्यास नायिकाले त्यस्तै दुर्लङ्घय जोखिमहरूसँग जुधेर आफ्नो प्रियतमका खातिर गरेको सङ्घर्षको कथा दर्शाइएको यस पुस्तक प्रकाशकको रुपमा इन्डीगो इङ्क प्रकाशन, काठमाडौं रहेको छ ।
