विशाल आवाज: फागुन २९ गते (होली) बाट नेपालमा प्रदर्शनमा आइरहेको मिलन चाम्स निर्देशित फिल्म “अन्जिला” दक्षिण कोरियाको ह्वासङमा पनि मार्च २३ तारिख प्रदर्शन हुने भएको छ।
महिला राष्ट्रिय फुटबल टिमकी कप्तान एन्जिला तुम्बापो सुब्बाले स्कुले जीवनदेखि फुटबल खेलाडी बन्न गरेको सङ्घर्ष र राष्ट्रिय टिमको कप्तान बन्दासम्मको कथा समेटिएको चलचित्र “अन्जिला” ह्वासङ नेपाली परिवार, दक्षिण कोरियाको आयोजनामा मार्च २३ तारिख आइतबारका दिन ह्वासङसीमा प्रदर्शन हुने भएको हो। ह्वासङ नेपाली परिवार, दक्षिण कोरियाको आयोजना तथा किराँत याक्थुङ चुम्लुङ दक्षिण कोरियाको सहजीकरणमा ह्वासङसीमा रहेको फारान स्थित साराङ फाङमा मा मध्यान्ह १२ बजे च्यारिटी शोको रूपमा प्रदर्शन गरिने चलचित्र “अन्जिला” हेर्न दर्शकले सहयोग स्वरूप १५००० वन तिर्नुपर्नेछ भने सहयोग गर्नुहुनेले जति पनि सहयोग स्वरुप दिना सकिने आयोजकले जनाएको छ।
नेपाल लगायत विभिन्न देशहरूमा प्रिमियर च्यारिटी शो गरि , सो मार्फत सङ्कलन भएको रकमले एन्जिला तुम्बापो को नाममा एउटा अत्याधुनिक र सुविधा सम्पन्न घर निर्माण गरी उक्त घरलाई फुटबल एकेडेमीको रुपमा विकास गर्दै सञ्चालन र व्यवस्थापन गर्ने आयोजकले जनाएको छ। उक्त फुटबल एकेडेमीमा क्षमता भएर पनि अवसर नपाएका आर्थिक र भौगोलिक हिसाबले असक्षम दूरदराजका क्षमतावान विपन्न वर्गका बालबालिकाहरूलाई अवसर दिई उनीहरूको शैक्षिक र खेलकुद विकासमा सहयोग पुर्याई दक्ष र क्षमतावान खेलाडीहरूको उत्पादन गर्ने उद्देश्यले गर्न लागेको च्यारिटी सो भएकाले पनि दक्षिण कोरियामा रहेका सम्पूर्ण नेपाली दाजुभाई तथा दिदीबहिनीहरुमा चलचित्र हेर्नका लागि आयोजकले विशाल आवाजमार्फत हार्दिक निमन्त्रणा समेत गरेको छ।
प्रेम कुमार श्रेष्ठ निर्माता रहेको ‘अञ्जिला’मा सुनिल थापा, विजय बराल, माओत्से गुरुङ, बुद्धि तामाङ, सुरज तमु लगायतको पनि अभिनय छ । निर्माता श्रेष्ठको पनि फिल्ममा महत्त्वपूर्ण भूमिका छ । फिल्मको छायाङ्कन सुदीप बरालले गरेका हुन् भने सम्पादन मिलन श्रेष्ठले गरेका छन् । मुन लभ इन्टरटेन्मेन्टको ब्यानरमा निर्माण भएको फिल्ममा टुबेन्द्र लिम्बु, विनोद अग्रवाल र राजेश बगडिया सह-निर्मातामा छन् । निर्माता श्रेष्ठले फिल्मको विश्वव्यापी कमाइबाट कप्तान एञ्जिलाका लागि काठमाडौंमा घर बनाइदिने घोषणा गरिसकेका छन् ।
