विशाल आवाज: नेपाली चलचित्र “छक्का पञ्जा ५” दक्षिण कोरियाको जिन्छनको मेगाबक्समा अक्टोबर १२ तारिखका दिन प्रदर्शन गरि नाफा आएको रकमबाट इवल समाज दक्षिण कोरियाले बाढी पीडितलाई राहत सामग्री वितरण गरेको छ।
पछिल्लो समय दक्षिण कोरियामा विभिन्न अभियानको नाममा कार्यक्रम आयोजना गर्ने क्रम बढ्दो मात्रामा छ। तर कतिपय संघसंस्थाले विभिन्न अभियानको नाममा कार्यक्रम गरेता पनि अन्तिममा हिसाबकिताब सार्वजनिक समेत गर्न आनाकानी गरिरहेको अवस्थामा इवल समाज दक्षिण कोरियाले भने आपतकालीन राहतको सहयोगार्थ भनी जिन्छनमा प्रदर्शन गरिएको चलचित्र “छक्का पञ्जा ५” बाट सङ्कलित रकमबाट बाढी पीडितलाई राहत स्वरूप सामग्री वितरण गरेको छ।
काभ्रे नमोबुद्ध नगरपालिका ६ भाङ्गेडाँडा चरङ्गेफेदिमा (रोशि खोला) मा गत वर्ष आएको बाढी पहिरोको कारण खानेपानीको पाइप बगाइ खानेपानीमा समस्या आएको हुँदा राहत स्वरूप समाजले खानेपानीको पाइप र धारा वितरण गरेको हो। गत वर्ष आएको बाढी पहिरोका कारण सो क्षेत्रका ६८ घरपरिवार लाइ खानेपानीको समस्या भइ सहयोगको खाँचो आवश्यक रहि आएको खबर सुनी पाइप र धारा किनेर सोही स्थानको खानेपानी उपभोक्ता समितिका अध्यक्ष पुष्कर न्यौपाने सहितको स्थानीय प्रतिनिधिहरुको रहोवरमा राहत सामग्री हस्तान्तरण गरिएको हो।
इवल समाज, दक्षिण कोरियाले बडा दशैँ २०८१ को पावन अवसरमा आपतकालीन राहतको सहयोगार्थ अक्टोबर १२ तारिख शनिबारका दिन बेलुकी ७:३० बजे जिन्छनको मेगाबक्समा “छक्का पञ्जा ५” प्रदर्शन गरेको थियो ।
