कोरियालि प्रहरीको अनुसन्धानमा परेका माओवादी नेता दिपशिखा आइतबार नेपाल फर्कदै
विशाल श्रेष्ठ/दक्षिण कोरिया:कोरिया स्थित नेपाली राजदूतले मगाएको औषधी बोकेका कारण अध्यागमनमा रोकिएर बिगत २ महिनादेखि कोरियाली प्रहरीको अनुसन्धानमा परेका नेकपा (माओवादी केन्द्र) का केन्द्रीय सदस्य रामप्रसाद सापकोटा ‘दीपशिखा’ को केस अनुसन्धान शुक्रबार सकिएर आइतबार नेपाल फर्कने भएका छन्।
गत अगस्ट १० मा कोरिया प्रस्थान गरेका दीपशिखाको साथमा चिकित्सकको प्रेस्किप्सन बिनाको औषधी भेटिएपछि कोरियाली प्रहरीले अनुसन्धान थालेको थियो।
स्रोतका अनुसार दीपशिखाले उक्त औषधी कोरियास्थित नेपाली राजदूत ज्योति प्याकुरेलका लागि लगिदिएका थिए। राजदूत प्याकुरेललाई एन्जाइटीको समस्या छ।
पहिलेदेखि नै नेपाली चिकित्सकले सुझाएको औषधी खाइरहेकी उनले दीपशिखासँग पनि त्यही औषधी मगाएकी थिइन।
इन्छन अन्तर्राष्ट्रिय विमानस्थलमा दीपशिखाले बोकेको औषधीको प्रेस्क्रिप्सन नभएपछि कोरियन अधिकारीहरूले रोकेका थिए।
राजदूतले मगाएको औषधी बोकेका दीपशिखा कोरियाली अध्यागमनमा रोकिएपछि दूतावासले उनलाई छुटाउन पहल गरेको थियो।
दूतावासको अनुरोधपछि दीपशिखा औषधी अध्यागमनमै छोडेर विमानस्थलबाट बाहिर निस्किन पाएका थिए।
