बिशाल आवाज – कोरियामा रहेका नेपालीहरूले यसपालिको छुसक पर्वलाई विशेष बनाउन पाउने भएका छन्। पाँचथर सेवा समाज दक्षिण कोरियाले आयोजना गर्न लागेको “पाँचथर सांगीतिक सौगात भाग–२ (२०२५)” अन्तर्गत चर्चित गायक सुजन चापागाईं एण्ड द इन्फिनिटीले दक्षिण कोरियामा लाइभ प्रस्तुत गर्ने भएका छन्।
“ग्रामीण क्षेत्रको शिक्षामा सहयोगार्थ साथै आपतकालीन राहत कोष अभिवृद्धि” मूल उद्देश्यसहित आयोजना गरिएको यस कार्यक्रममा नेपाली सांगीतिक आकाशका लोकप्रिय आवाज श्रेया राइ र नोगेन लिम्बुको पनि प्रस्तुत हुने भएका छन्।
कार्यक्रम २०२५ अक्टोबर ५ (आइतबार) का दिन राजधानी सउलको KUKKIWON, गंगनम मा भव्य रूपमा हुने तय भएको छ।गेट अपराह्न २ बजे खुल्नेछ भने लाइभ प्रस्तुति साँझ ५:३० बजेबाट सुरु हुनेछ।
पाँचथर सेवा समाज दक्षिण कोरियाका अध्यक्ष रमेश लावतीका अनुसार, “पाँचथर सांगीतिक सौगात भाग–२” कार्यक्रम प्रवासी नेपालीबीच भाईचारा अभिवृद्धि गर्ने, नेपाली सांगीतिक संस्कृति प्रवर्द्धन गर्ने र समाजसेवी कार्यमा सहयोग जुटाउने उद्देश्यसहित आयोजना गरिएको हो।
यसअघि पनि संस्थाले विभिन्न सामाजिक तथा सांस्कृतिक कार्यक्रम गर्दै आएको छ। यो कार्यक्रमबाट संकलित सहयोग रकम ग्रामीण शिक्षाको प्रवर्द्धन र आपतकालीन कोषमा विनियोजन गरिनेछ।
कार्यक्रममा सुजन चापागाईं एण्ड द इन्फिनिटीले आफ्नो लोकप्रिय गीत प्रस्तुत गर्नेछन् भने श्रेया राइ र नोगेन लिम्बुको दमदार प्रस्तुति दर्शकले प्रत्यक्ष अनुभव गर्नेछन्।
आयोजकले कार्यक्रमलाई सफल बनाउनका लागि नेपाल सम्पर्क समिति दक्षिण कोरिया र पूर्वी नेपाल समाज दक्षिण कोरियाको समेत सहकार्य रहेको छ।
छुसक बिदाको अवसर पारेर हुन लागेको यो कार्यक्रम प्रवासी नेपालीहरूको ठूलो भेटघाट तथा मनोरञ्जनको प्रमुख आकर्षण हुने अपेक्षा गरिएको छ।
