फेन्थेक (कोरिया)। कोरियामा रहेका नेपाली समुदायलाई लक्षित गर्दै 경기도 (ख्यङ्गि) प्रान्तको फेन्थेक शहरमा नवलपुर समाज दक्षिण कोरियाले सुविधा सम्पन्न ‘नवलपुर सेल्टर’ औपचारिक रूपमा सञ्चालनमा ल्याएको छ।
आइतबार आयोजित विशेष कार्यक्रममा दक्षिण कोरियामा सक्रिय विभिन्न सामाजिक व्यक्तित्वहरूको उपस्थितिमा भव्य उद्घाटन गरिएको हो। कार्यक्रममा समाजका अध्यक्ष हरि कंडेलको अध्यक्षता, संरक्षक सुजन श्रेष्ठको प्रमुख आतिथ्यता, प्रथम अध्यक्ष हेम पाठक, संरक्षक आर.पी देवकोटा, कलाकार एवं समाजसेवी बिष्णु पाण्डेको विशेष आतिथ्यता रहेको थियो। कार्यक्रममा संस्थाका सचिव नविन मानन्धरले सञ्चालन गर्नुभएको थियो भने, सल्लाहकार किसन पौडेल, श्री कंडेल, पुरुषोत्तम अर्याल, वरिष्ठ उपाध्यक्ष मनोज पंगेनी, उपाध्यक्ष खेम पंगेनी, संगठन विभाग प्रमुख पाण्डव खनाल लगायतका व्यक्तित्वहरूले शुभकामना मन्तव्य दिएका थिए।
समाजका संरक्षक सुजन श्रेष्ठको अथक प्रयास र योगदानकै कारण सेल्टर मूर्त रूप लिन सफल भएको आयोजकहरूले बताएका छन्। कार्यक्रममा संरक्षक, सल्लाहकार तथा आजिवन सदस्यहरूलाई विशेष सम्मानसमेत गरिएको थियो।
यस सेल्टरमा विशेषगरी काम छोडेर बस्नुपरेका, आपत्कालीन अवस्थामा परेको वा अस्थायी आश्रय चाहिने नेपालीहरूले आफ्नोपनका साथ बस्न सक्ने व्यवस्था गरिएको छ। नवलपुर समाज दक्षिण कोरियाका अध्यक्ष हरि कण्डेलले सेल्टरले नेपाली समुदायलाई ठूलो राहत पुर्याउने विश्वास व्यक्त गर्नुभयो।
नवलपुर समाजका पदाधिकारीहरूले यो सेल्टर नवलपुरबासी मात्र नभई सम्पूर्ण नेपालीहरूको साझा आश्रयस्थल हुने बताएका छन्। साथै, परदेशमा सामाजिक सुरक्षाको नयाँ अध्यायको सुरुवात भएको भन्दै सबै सहयोगी र शुभेच्छुकप्रति आभार व्यक्त गरिएको छ।
