दक्षिण कोरियाको बुसानस्थित अस्पतालमा उपचाररत उदयपुर चौदण्डीगढी नगरपालिका–५ सुन्दरपुर बेल्हा निवासी कमल चौधरीको निधन भएको छ। विगत डेढ महिनादेखि कोमामा रहेका चौधरीको उपचारकै क्रममा आज दिउसो १ बजे ज्यान गएको हो।
इपिएस मार्फत कृषिक्षेत्रमा कार्यरत चौधरी केही महिनाअघि मात्रै काम छोडेर नयाँ रोजगारीको खोजीमा सेल्टरमा बसिरहेका थिए। त्यही क्रममा उनी एकाएक बेहोस भई प्रहरीले एम्बुलेन्समार्फत अस्पताल पुर्याएको थियो। चिकित्सकले उनको टाउकोमा रगत जम्ने (Brain Hemorrhage) समस्या देखाएका थिए।
घटनापछि उनलाई Chosun University Hospital को आईसीयूमा राखेर उपचार गरिएको थियो। तीन हप्तासम्म आईसीयूमा राख्दा कहिलेकाहीं उनले हातखुट्टा चलाउने र आँखा झिम्क्याउने गरे पनि स्वास्थ्यमा सुधार नआएपछि अन्ततः जीवन रक्षा हुन सकेन।
उपचार अवधिभर करिब १८ लाख रुपैयाँ (१ करोड ८० लाख वोनभन्दा बढी) खर्च भइसकेको छ। तर चौधरीको आर्थिक अवस्था कमजोर भएकाले उक्त खर्च व्यहोर्न असमर्थ रहेको परिवारले जनाएको छ।
उनको उपचारमा सहयोग जुटाउन कोरियामा रहेका विभिन्न संघ–संस्था, विशेषगरी थारु कल्याणकारी समाज र उदयपुर सेवा समाज, कोरिया संयुक्त रूपमा अभियान सञ्चालन गर्दै आएका थिए।
