दक्षिण कोरियाली सरकारले यो वर्षको दोस्रो छ महिनाका लागि करिब २२,७०० विदेशी मौसमी श्रमिकहरू खटाउने योजना सार्वजनिक गरेको छ।
यसले बाली भित्र्याउने समयमा श्रमिक अभाव झेलिरहेका ग्रामीण कृषि तथा मत्स्य क्षेत्रलाई सहयोग गर्नेछ। न्याय मन्त्रालयले कृषि, खाद्य तथा ग्रामीण मामिला मन्त्रालय र समुद्री तथा मत्स्य मन्त्रालयसँगको छलफलपछि देशभरका १०० वटा स्थानीय सरकारलाई २२,७३१ विदेशी श्रमिक पठाउने निर्णय गरेको हो।
यो निर्णयले आगामी बाली भित्र्याउने सिजनलाई ध्यानमा राख्दै कृषि र मत्स्य क्षेत्रमा बढ्दो श्रमिक आवश्यकतालाई सम्बोधन गर्ने उद्देश्य राखेको छ।
योसंगै, सन् २०२५ मा कुल ९५,७०० विदेशी मौसमी श्रमिक दक्षिण कोरियाली कृषि तथा मत्स्य क्षेत्रमा खटिनेछन्। जसमध्ये ८६,६३३ जना कृषि क्षेत्रमा र ८,८७६ जना मत्स्य क्षेत्रमा खटाइनेछन्। यसअघि पहिलो छ महिनामा ७२,६८४ जना श्रमिक ल्याउने योजना सरकारले घोषणा गरिसकेको थियो। यो संख्या गत वर्षको ६६,७७८ को तुलनामा ४१ प्रतिशतले वृद्धि भएको हो।
