सुदूरपश्चिम समाज, दक्षिण कोरियाले नयाँ नेपाली वर्ष २०८२ को अवसरमा शुभकामना आदानप्रदान तथा देउडा कार्यक्रम सम्पन्न गरेको छ । सुदूरपश्चिममा प्रत्येक नयाँ वर्षको अवसरमा मनाइँदै आएको मौलिक पर्व “विशु पर्व” लाई लक्षित गर्दै समाजले देउडा खेलसहितको मनोरञ्जनात्मक कार्यक्रम आयोजना गरेको हो ।
आइतबार सम्पन्न उक्त कार्यक्रममा कोरियामा विभिन्न क्षेत्रमा कार्यरत सुदूरपश्चिमका थुप्रै व्यक्तित्वहरूको उल्लेखनीय उपस्थिति रहेको थियो ।
कार्यक्रममा लोकप्रिय देउडा गायिका गिता चनाराले कर्णाली र सुदूरपश्चिम क्षेत्रका लोक भाका तथा देउडा गीतहरू प्रस्तुत गरेर दर्शकहरूलाई मनोरञ्जन प्रदान गरेकी थिइन् । कार्यक्रममा समाजका अध्यक्ष महेश भट्टले गायिका चनारालाई प्रशंसापत्र र दोसल्ला ओढाएर सम्मान गरेका थिए ।
कोरियाको राजधानी सउलमा सम्पन्न सो कार्यक्रममा सुदूरपश्चिम समाजका अध्यक्ष महेश भट्टको सभापतित्व रहेको थियो भने समाजका संरक्षक जितेन्द्र महता प्रमुख अतिथि थिए ।
शुभकामना मन्तव्यका क्रममा प्रमुख अतिथि महताले विशु पर्वको पौराणिक तथा सांस्कृतिक महत्वबारे प्रकाश पार्दै देश-विदेशमा रहेका सम्पूर्ण नेपालीको सुख, शान्ति र उत्तरोत्तर प्रगतिका लागि शुभकामना व्यक्त गरे ।
कार्यक्रममा जितेन्द्र महता, ईश्वर धामी, नरेश रावल, दिपेन्द्र रोकाया, नेत्र कुँवर लगायतले आ-आफ्ना मौलिक प्रस्तुति दिएका थिए ।
कार्यक्रमका सभापति महेश भट्टले शुभकामना व्यक्त गर्दै समाजमा सबैले गरेको योगदानप्रति आभार प्रकट गरे । कार्यक्रमको सञ्चालन समाजका महासचिव नवराज तिमिल्सिनाले गरेका थिए ।
