विशाल आवाज:नेपाली सम्पर्क समिति(एनसीसी) गणतन्त्र कोरियाले प्रदेश संस्थाहरूबीचको विवादलाई टुङ्गो लगाउँदै सलनालको अवसरमा हुने कार्यक्रम हरुको सहजीकरण नोभेम्बर १७ तारिखका दिन दोङ्देमुनमा गर्ने भएको छ।
गत शनिबार का दिन दोङ्देमुनको नाना रेस्टुरेन्टमा एनसिसिका अध्यक्ष हरि प्रसाद खनालको अध्यक्षतामा एनसिसीका प्रतिनिधी सहित र सुदूरपश्चिम, पूर्वी नेपाल, कर्णाली,गण्डकी, बागमती,लुम्बिनी ६ वटै प्रदेश समाजका अध्यक्ष सहित भौतिक बैठक(बागमती प्रदेश एकता समाजका अध्यक्ष बीपी पौडेल मेसेन्जर अनलाईन माध्यमबाट जोडिनुभएको) बसी नया अबधारणा र सहमति पत्र सहित निर्णय गरिएको हो।
यस अघिनै अप्रिल १ तारिखका दिन एनसीसी, प्रदेश र आदिवासी जनजाति महासङ्घ बीच जुम भर्चुअल माध्यम वाट बसेको बैठक द्वारा नै आदिवासी जनजाति महासंघका अध्यक्ष बिसन राईले सलनाल तथा छुसकका ठूला दिवा सांस्कृतिक कार्यक्रममा समन्वय गरिने भनि सहमति दिइसक्नुभएको एनसीसी महासचिव दीपक थापा मगरले विशाल आवाजलाई बताउनुभयो।
सबैको निर्णय बमोजिम प्रदेश र आदिवासी महासंघ बाट बाँडफाँड भएर आएका कार्यक्रम हरूको समय तालिका नेपाली सम्पर्क समितीले मिलाएर कार्यक्रम सहजीकरण गर्ने जनाइएको छ। यसैको निर्णय अनुरूप नेपाली सम्पर्क समिति दक्षिण कोरियाले यही नोभेम्बर १७ तारिख आइतबारका दिन बिहान ठिक ११ बजे दोङ्देमुन स्थित पूर्वी नेपाल समाज दक्षिण कोरियाको सभा हलमा एक कार्यक्रम गरी कोरियाको महान चाड सलनालको अवसरमा गरिने कार्यक्रम हरुको सहजीकरण गर्ने भएको छ।
यसअघि सबै संस्थाहरूको छाता संस्थाको रुपमा मान्दै आइएको नेपाली सम्पर्क समिति आगामी दिनबाट छाता संस्था भन्दा पनि सबै संस्थाहरूको साझा संस्थाको रूपमा मानेर जाने समेत बैठकमा निर्णय भएको छ। यसैगरी कार्यक्रम बाँडफाँड प्रदेशले गर्ने र प्रदेशले बाँडफाँड गरेको कार्यक्रमलाई एनसीसीले सहजीकरण गर्ने समेत बताइएको छ।
