प्रवासी भूमि दक्षिण कोरियामा रहेर नेपाली मुक्तकको विकास र विस्तारमा अनवरत रुपमा सकृय सँस्था नेपाल मुक्तक प्रतिष्ठान दक्षिण कोरियाले कोरियन नयाँवर्ष सलनालको अवसरमा बृहत् साहित्यमेला गर्ने भएको छ।
सलनालको दोश्रो दिन अर्थात् फेब्रुअरी १० शनिबार कोरियाको राजधानी शहर सौलको तोङ्देमुनमा रहेको शुभेच्छा रेस्टुरेन्टको सभाहलमा कार्यक्रम गर्न लागिएको हो। नेपाली साहित्यका तिन विधा कविता, गजल र मुक्तकमा ३/३ जना गरि जम्मा नौ जना स्रस्टाहरुमा रचनाहरु वाचन हुनेछन् । कविहरु जीवन खत्री, दिपा मेवाहाङ र विजयता भण्डारीका दमदार कविताहरु वाचन हुनुका साथै गजलकारहरु सरोज सर्वहारा, राज विसर्जन र डिएनके कुँवरले मेहफिल तताउने पक्का छ। त्यसैगरि मुक्तक विधामा मुक्तककार त्रय सुशिल अर्याल, प्रचण्ड सापकोटा र विवेक रिजालका चोटीला मुक्तकहरुले कार्यक्रमको रौनकता थप उचाइमा लानुका साथै उक्त दिन प्रेम, राजनिति, सामाजिक सँस्कार र नेपाल प्रतिको प्रेमले कोरियाको राजधानी शहर तात्ने दाबी सँस्थाका कार्यबाहक अध्यक्ष निर्दोष शिवले गर्नुभएको छ।
उपस्थित स्रस्टाका पनि रचना वाचन गर्न पाइने भएकोले रचना सुन्ने र सुनाउने यस कार्यक्रममा पुग्नको लागि तोङ्देमुन स्टेसनको ३ नं गेटबाट निस्केर ३० मिटर अगाडि रहेको शुभेच्छा रेस्टुरेन्टमा पुग्नुपर्ने छ।
