पाँच स दक्षिण कोरियाद्धारा संयुक्त बिजयादशमी महोत्सवको आयव्यय सार्वजनिक
कमला केसी/दक्षिण कोरिया:दक्षिण कोरियामा सक्रिय पाँच-स ले बिजयादशमी महोत्सव २०८० को आयव्यय सार्वजनिक गरेको छ ।
आइतवार अर्थात डिसेम्वर ३ तारिखमा जुम मार्फत सार्वजनिक गरिएको आयब्ययमा उक्त कार्यक्रमवाट ४१ लाख, २१ हजार ४२ वन बचत गर्न सफल भएको उल्लेख गरिएको छ । कार्यक्रममा कुल १ करोड ६ लाख ९ हजार ६ सय २२ वन आम्दानी भएकोमा ६४ लाख ८८ हजार ५ सय ८० वन खर्च भएको आर्थिक संयोजक महेन्द्र सापकोटाले जानकारी दिनुभयो ।
बचत रकम मन्दीर संचालनमा खर्च गरिने उहाँको भनाई रहेको छ । गतबर्ष गरिएको दशैं कार्यक्रममा करिब ७ लाख वन घाटा भएपनि यसपालि भने ४१ लाख २१ हजार बचत गर्न सफल भएको उहाँले बताउनुभयो ।
पुर्विय सनातन धर्म, कला, संस्कार एवम् संस्कृतिको संरक्षण तथा सम्वद्र्धन गर्ने उद्देश्यले ’ पाँच स स्थापना भएको सनातन, साहित्य, समुह पाँच सले यस्तै रचनात्मक काम गर्दै आएको छ । पाँच स लगायात दक्षिण कोरियामा क्रियाशिल अन्य २१ वटा संस्थाहरुद्वारा आयोजित संयुक्त विजया दशमी महोत्सव-२०८० भव्यताका साथ सम्पन्न भएको संस्थाका वरिष्ठ उपाध्यक्ष एबं कार्यक्रम संयोजक श्याम अर्यालले जानकारी दिनुभयो ।
कार्यक्रमको संचालन महासचिव चुणामणि भण्डारीले गर्नुभएको थियो । सो अवसरमा संस्थाका कार्यवाहक अध्यक्ष बिष्णु थापाले यस वर्षको बिजयादशमी महोत्सववाट भएको आम्दानी मन्दिर संचालनमा खर्च गरिने बताउँदै सनानत धर्मको रक्षा र नेपालीहरुको हितका लागि आगामी दिनमा पनि यस्तै रचनात्मक कार्यक्रम गरिने बताउनुभयो ।
कला, संस्कार, संस्कृति, भेषभुषा, चाडपर्व आदिले राष्ट्रको परिचय दिने कुरालाई आत्मसात गरि धर्म, कला , संस्कार, संस्कृतिको संरक्षण सम्वद्र्धन गर्ने उद्देश्यले “साहित्य र सङ्गीतको माध्यमद्वारा विश्वमा अध्यात्मित जागरण गराउने हाम्रो प्रयास“ भन्ने मुल नाराका साथ सन् २०१७ सालमा दक्षिण कोरियामा स्थापना भएको सनातन साहित्य सङ्गीत साधना समूहले राष्ट्र र राष्ट्रियता झल्किने विभिन्न कार्यक्रमहरु गर्दै आईरहेको छ । बिशेष गरि हरेक नेपाली चाडपर्वहरुलाई विधिवत र भव्यताका साथ मनाउदै आईरहेको पाँच स दक्षिण कोरियाले बिदेशमा रहेका नेपाली समुदायमा एक छुट्टै, सकरात्मक ,अनुकरणीय र एकताको सन्देश प्रवाह गर्दै आएको थापाले बताउनुभयो ।
आम नेपाली दाजुभाई दिदीबहिनीहरुको सहयोग र विभिन्न धार्मिक कार्यक्रमको आयोजना गरि उक्त कार्यक्रमबाट बचेको थोरै थोरै रकम जम्मा गर्दै विगत २ बर्ष देखी दक्षिण कोरियाको आनसान शहर स्थित साझा मन्दिर/पुस्तकालय तथा साँस्कृतिक घर सञ्चालन गर्दै आईरहेको छ । आनसान नगरपालिका अन्तर्गतको आनसान लाईब्रेरीमा आनसान नेपाली लाईब्रेरीको नाममा दर्ता गर्न सफल पाँच सले विभिन्न विधाका ५००० पुस्तक सहितको पुस्तकालयबाट नेपालीहरुले विदाको समयमा पुस्तक पढ्न रुची राख्नेहरु लाभान्वित बनेका छन् ।
