एउटा लिंक क्लिक गर्दा ३८ करोड वन गायब
दक्षिण कोरियामा हालसालै एउटा यस्तो घटना भएको छ जस्ले गर्दा एकजना व्यक्तिको जिवनभर बचाएर राखेको रकम सबै गायब भयो । अगस्ट २४ तारिक बेलुकी चार बजे उक्त व्यक्तिको मोबाइलमा म्यासेज आयो, लेखिएको थियो, कुरियर ठेगाना गलत भएको छ सच्चाउनका लागी यो लिंक क्लिक गर्नुहोला । त्यो म्यासेज पाएपछी उनले तुरुन्तै उक्त लिंक क्लिक गरे, क्लिक गर्ने वित्तिकै मोबाइलले काम गर्न छोड्यो । त्यस्को ८ घन्टा पछी थाहा भयो, उनको खातमा रहेको ३८३ मिलियन वन अर्थात नेपाली करिब तिन करोड असी लाख रुपैयाँ गायब भयो । यो घटना बुसानको भएकाले उनले बुसानको सासाङ प्रहरी चौकीमा उजुरी दिएका छन् । उजुरीकर्ताको बयानको आधारमा प्रहरीले अनुसन्धान गरिरहेको छ ।
पिडीतले रकम ट्रान्सफर गर्दा ओटीपी आउनुपर्नेमा त्यो पनि नआइ रकम ट्रान्सफर भएकोमा अचम्मित भएको र आफ्नो जिवनभर बचत गरेको पैसा एकै लिंक क्लिक गर्दा स्वाह भएकोमा दुख समेत व्यक्त गरे ।
कोरियामा रहने हामी नेपालीहरुको मोबाइल र सामाजिक संजालहरुमा पनि कुनै लोभलाग्दो देखिने, कुनै जरुरी जस्तो देखिने म्यासेजहरु आइरहेका हुन्छन् । त्यस्ता लिंकहरुमा क्लिक गर्नुहुँदैन । के रहेछ भन्ने उत्सुकताले वा अन्जानमै यस्तै लिंक क्लिक गर्दा ह्याकरहरुले विच्छाएको जालोमा पर्न सकिन्छ ।
कतै युवति मिलाइदिने, कतै घरै बसी बसी पैसा कमाउन सकिने र यस्तै यस्तै बहानाका म्यासेजहरुबाट सावधानी अपनाउनुपर्छ ।
सामाजिक संजालतिर पनि सकेसम्म अपरिचितलाइ साथी बनाउनु हुँदैन । नत्र ३ करोड असी लाख गुमाएको कोरियनको जस्तै हालत पनि नहोला भन्न सकिन्न ।
