कोरियामा रहेका नेपाली श्रमिकहरुको स्वास्थ्य जाँच सम्बन्धि कार्यक्रम सञ्चालनमा
बासुदेव भट्ट/दक्षिण कोरिया
दक्षिण कोरियामा रहेका नेपाली श्रमिकहरुको स्वास्थ्यलाई मध्यनजर गर्दै सामाजिक संजाल फेसबुक लाइभ मार्फत कार्यक्रम “सुनौ सिकौ” संचालनमा ल्याइएको छ। दक्षिण कोरिया स्थित नेपाली राजदुतावास, दक्षिण कोरिया बैदेशिक रोजगार बोर्ड सचिवालयको आयोजना तथा टिको अर्गनाइजेसनको व्यवस्थापकीय सहयोगमा उक्त कार्यक्रम संचालनमा आएको हो।
दक्षिण कोरिया राजदुतावास, सिओलले आफ्नो फेसबुक लाइभ मार्फत प्रतेक आइतबार कोरियाको समय अनुसार साझ ७:३० बजेदेखि ८:३० बजेका बिच कार्यक्रम “सुनौ सिकौ” प्रसारण गरिने जनाएको छ।
कार्यक्रम “सुनौ सिकौ” मा कोरियामा कार्यरत नेपाली श्रमिकहरुको वैदेशिक रोजगारमा रहँदाका विविध शारीरिक, मानसिक, मनोसामाजिक समस्यालाई सम्बोधन गरिने छ। उक्त कार्यक्रममा विशेषत शारीरिक तथा मानसिक स्वास्थ्यलाई मध्यनजर गर्दै डाक्टर, चिकित्सक, मनोसामाजिक परामर्शदाता, श्रम विशेषज्ञ, कलाकार, गायक गायिका, उत्प्रेरक वक्ता आदिको प्रस्तुतीकरण रहने सिओल स्थित नेपाली राजदुतावासले जनाएको छ।
सिओल स्थित नेपाली राजदुतावासले कोरियामा कार्यरत नेपाली श्रमिकहरुलाई लक्षित गरि तयार पारिएको उक्त कार्यक्रममा सहभागी हुँदा रमाइलो हुनेका साथै सुन्दै धेरै कुरा सिक्न मिल्ने समेत जनाएको छ। साथै कोरियामा रहेका बढिभन्दा बढी नेपालीहरुलाई कार्यक्रममा सहभागी गराउन सहयोग गर्न राजदुतावासले यहाँ रहेका नेपालीहरुमा आग्रह गरेको छ।
