दक्षिण कोरियामा रहेका बाग्लुङेलीहरूको साझा संस्था बाग्लुङ समाज दक्षिण कोरिया थेगु शाखाले बाग्लुङ समाज दक्षिण कोरियाको रजत जयन्तीको विशेष अवसर पारेर आयोजना गर्न लागेको “दोस्रो बाग्लुङ घुम्टे भलिबल कप–२०२६” को तयारीलाई तीव्र बनाएको जनाएको छ।
“शारीरिक तन्दुरुस्ती, राष्ट्रिय खेलकुद प्रवर्द्धन र आपसी सद्भावको लागि खेल” भन्ने मूल नारासहित आयोजना हुन लागेको उक्त प्रतियोगिता आगामी मे २४ तारिख थेगुमा सञ्चालन हुने आयोजकले जानकारी दिएको छ। प्रतियोगितिमा विभिन्न नेपाली संघसंस्था तथा खेलप्रेमी टोलीहरूको उत्साहजनक सहभागिता रहने अपेक्षा गरिएको छ।
आयोजकका अनुसार प्रतियोगिताका लागि टोली दर्ता गर्ने अन्तिम मिति यही मे १७ सम्म मात्रै रहेको छ। समयमै टोली दर्ता गराई सहभागिता जनाउन आयोजकले सम्पूर्ण खेलप्रेमी तथा संघसंस्थालाई आग्रह गरेको छ।
प्रतियोगितामा विजेता टोलीले ३० लाख वन नगद, ट्रफी, मेडल र प्रमाणपत्र प्राप्त गर्नेछ भने उपविजेताले १८ लाख वनसहित ट्रफी, मेडल र प्रमाणपत्र प्राप्त गर्नेछन्। त्यसैगरी सेमिफाइनल पुग्ने दुई टोलीलाई ६/६ लाख वन प्रदान गरिनेछ। उत्कृष्ट खेलाडी, स्पाइकर, ब्लकर, सेटर, सर्भर र डिफेन्डरलाई समेत १ लाख वन सहित मेडस,प्रमाण पत्रको व्यवस्था गरिएको आयोजकले जनाएको छ।
भलिबल प्रतियोगितासँगै पञ्चेबाजाको विशेष प्रस्तुति पनि रहनेछ, जसले कार्यक्रमलाई अझ आकर्षक बनाउने विश्वास गरिएको छ। यसैबीच, बाग्लुङ समाज दक्षिण कोरिया को गौरवमय २५औँ वर्ष अर्थात् रजत जयन्ती विशेष मूल समारोह आगामी जुन ७ तारिख “निरामया दोहोरी साँझ” हल, फेन्थेकमा भव्य रूपमा आयोजना हुने तय भएको छ। रजत जयन्ती समारोहलाई ऐतिहासिक र स्मरणीय बनाउने तयारीसमेत तीव्र रूपमा अघि बढाइएको समाजले जनाएको छ।
