प्रवासीबाट उद्यमीतर्फ प्रेरणा: गण्डकी प्रदेश समाज दक्षिण कोरियाद्वारा ‘उद्यमशीलता कार्यक्रम’ (भाग–२) आयोजना हुने
दक्षिण कोरियामा क्रियाशील गण्डकी प्रदेश समाज दक्षिण कोरियाले प्रवासी नेपालीहरूलाई उद्यमशीलतामा प्रेरित गर्ने उद्देश्यसहित ‘उद्यमशीलता कार्यक्रम’ (भाग–२) आयोजना गर्ने भएको छ। उक्त कार्यक्रम आगामी २०२६ अप्रिल १८, शनिबार, कोरियाली समय अनुसार बेलुका ८:१५ देखि ९:१५ बजेसम्म सञ्चालन हुनेछ।
“प्रवासीबाट उद्यमीका यात्रा तर्फ” भन्ने मूल नारासहित आयोजना हुन लागेको यस कार्यक्रमले विदेशमा आर्जित ज्ञान, सीप र पुँजीलाई स्वदेशमै लगानी गरी उद्यम सिर्जना गर्न प्रेरित गर्ने लक्ष्य लिएको छ।
कार्यक्रमका विशेष अतिथिका रूपमा सफल उद्यमी सर्वोदय ढकाल सहभागी हुनेछन्। उनले दक्षिण कोरियामा लामो समय काम गरी नेपाल फर्किएपछि स्याङ्जाको आँधिखोला गाउँपालिका–६ मा कैलाश एग्रो तथा कृषि फार्म (बाख्रा तथा भैँसी पालन), पोखरा–२२ ठुलढुङ्गामा कैलाश कुटी एण्ड कटेज, तथा पोखरा–१७ विरौटामा विरौटा स्केट पार्क तथा प्लेजोन सञ्चालन गर्दै आएका छन्। उनको अनुभव र संघर्षपूर्ण यात्राले प्रवासी नेपालीहरूलाई स्वदेशमै सम्भावना खोज्न प्रेरणा दिने विश्वास आयोजकको छ।
कार्यक्रमका प्रस्तोता डा. बाबुकाजी श्रेष्ठ रहनेछन्, जसले कार्यक्रमलाई संवादात्मक र जानकारीमूलक ढंगले सञ्चालन गर्नेछन्। कार्यक्रम गण्डकी प्रदेश समाजको आधिकारिक फेसबुक पेज तथा पोखरा टेलिभिजनमार्फत प्रत्यक्ष प्रसारण गरिने जनाइएको छ। गण्डकी प्रदेश समाजले “रोजगारी खोज्ने मात्र होइन, रोजगारी सिर्जना गर्ने उद्यमी बनौँ” भन्ने सन्देशसहित प्रवासी नेपालीहरूलाई उद्यमशीलतामा जोड्ने अभियान निरन्तर अघि बढाउने प्रतिबद्धता जनाएको छ।
