दक्षिण कोरियामा सक्रिय नेपाल मगर संघ दक्षिण कोरिया ले प्रत्येक वर्ष मनाउँदै आएको परम्परागत भुमे पूजा यस वर्ष पनि निरन्तरता दिँदै आयोजना गर्ने भएको छ। यसअघिका वर्षहरूमा विभिन्न स्थानमा आयोजना हुँदै आएको यो महत्वपूर्ण सांस्कृतिक कार्यक्रम यसपटक किम्हे–बुसान क्षेत्रमा आयोजना गरिने भएको हो।
संघद्वारा जारी सूचनाअनुसार, २०२६ जुन १३ र १४ तारिखमा हुने भुमे पूजा तथा वृहत बनभोज कार्यक्रम किम्हे/बुसान शाखाको मुख्य व्यवस्थापनमा सञ्चालन हुनेछ। दक्षिण कोरियाभर रहेका सम्पूर्ण संघ–संस्थालाई समन्वयात्मक भूमिका खेल्न आग्रह गरिएको छ भने मगर समुदायसँगै अन्य नेपाली दाजुभाइ तथा दिदीबहिनीलाई पनि सहभागिताका लागि आह्वान गरिएको छ।
मगर समुदायको महत्वपूर्ण धार्मिक तथा सांस्कृतिक पर्वका रूपमा रहेको भुमे पूजामा प्रकृतिको पूजा गरिन्छ। यस क्रममा भूमिदेवता (भुमे) लाई प्रसन्न पार्न परम्परागत विधिअनुसार पूजा गर्ने, पुजारीद्वारा मन्त्र उच्चारण गर्ने जस्ता क्रियाकलाप गरिन्छ। साथै, परम्परागत भेषभूषामा सजिएर सामूहिक नाचगान गर्ने, सांस्कृतिक प्रस्तुति देखाउने र समुदायबीच आपसी सद्भाव साटासाट गर्ने चलन पनि रहेको छ।
कार्यक्रमसँगै आयोजना गरिने बनभोजमा सहभागीहरूबीच सामूहिक भोजन, भेटघाट तथा भाइचारा सुदृढ गर्ने गतिविधि हुने गर्दछ। संघले यस कार्यक्रमलाई भव्य र सफल बनाउन सबैमा सक्रिय सहभागिताको अपिल गरेको छ।
