भदौ २३ र २४ गते नेपालमा भएको हिंसात्मक Gen Z आन्दोलनपछि उत्पन्न मानवीय संकटलाई लक्षित गर्दै MRR KOREA को सयोजकत्वमा दक्षिण कोरियामा रहेका नेपालीहरूले संकलन गरेको सहयोग रकमको विवरण सार्वजनिक गरिएको छ।
आन्दोलनमा सहिद भएका परिवारको लागि र घाइतेहरूको उपचारमा सहयोग पुर्याउने उद्देश्यले कोरियामा रहेका नेपालीहरूले MRR Korea को नेतृत्वमा आर्थिक संकलन अभियान सुरु गरेका थिए। अभियान अन्तर्गत छोटो समयमै उल्लेखनीय रकम संकलन भएको थियो। सार्वजनिक गरिएको विवरणअनुसार ३५ लाख नेपाली रुपैयाँ (३५,४९,२१५) रुपैयाँ बराबर संकलन भएको थियो। सो रकममध्ये ३५,१२,२५५ रुपैयाँ नेपाल पठाइसकिएको र त्यसमध्ये ३४,३२,१५८ रुपैयाँ विभिन्न घाइते तथा शहीद परिवारलाई वितरण गरिएको उल्लेख गरिएको छ। साथै केही रकम अन्य खर्चमा प्रयोग गरिएको छ भने करिब १ लाख १७ हजार रुपैयाँ बाँकी रहेको जानकारी दिइएको छ।
MRR Korea ले सार्वजनिक गरेको विवरणमा घाइतेहरूलाई विभिन्न जिल्लामा प्रत्यक्ष रूपमा आर्थिक सहयोग उपलब्ध गराइएको र शहीद परिवारलाई समेत राहत वितरण गरिएको उल्लेख छ। विवरणअनुसार ४५ जना शहीद परिवारका सदस्यलाई जनही ५० हजार रुपैयाँका दरले जम्मा रु २२ लाख ५० हजार सहयोग प्रदान गरिएको छ। यस अभियानमार्फत संकलित रकम पारदर्शी रूपमा वितरण गरिएको भन्दै टोलीले सम्पूर्ण सहयोगदाताप्रति आभार व्यक्त गरेको छ। साथै, अझै पनि केही घाइतेहरू उपचाररत रहेकाले आवश्यक परेमा थप सहयोगका लागि सम्पर्कमा आउन आग्रह गरिएको छ। भदौ २३ र २४ गते भएको Gen Z आन्दोलनले ठूलो जनधनको क्षति पुर्याएको छ भने यसले देशको राजनीतिक तथा सामाजिक अवस्थालाई समेत प्रभावित बनाएको छ। यस्तो अवस्थामा विदेशमा रहेका नेपालीहरूको एकजुटता र सहयोगले पीडितहरूलाई राहत पुग्ने अपेक्षा गरिएको छ।
