दक्षिण कोरियामा क्रियाशील नेपालीहरूको सामाजिक संस्था नेपाली सम्पर्क समिति (एनसीसी) दक्षिण कोरियाको १९औँ अधिवेशन भेलि सियोलमा आयोजना हुँदैछ। अधिवेशनमार्फत नयाँ नेतृत्व चयन गर्ने तयारी भइरहेका बेला अध्यक्ष पदका लागि पाँच जना आकांक्षी देखिएका छन्। अध्यक्ष पदका लागि हर्क बिष्ट, मनोज कुमार सुवेदी, प्रविण गिरी, चित्र घले र हरिप्रसाद खनालबीच कडा प्रतिस्पर्धा हुने संकेत देखिएको छ। यसपटक नेतृत्व कसले सम्हाल्ने भन्ने विषयले दक्षिण कोरियामा रहेका नेपाली समुदायबीच व्यापक चासो बढाएको छ।
यद्यपि भोलि हुने अधिवेशनबाटै नयाँ कार्यसमिति गठन हुने सम्भावना भने कम देखिएको छ। अधिवेशनमा सहभागी पक्षहरूबीच सहमति जुटेर सर्वसम्मत नेतृत्व चयन गर्न सकिएमा मात्रै भोलि नै नयाँ नेतृत्व टुंगिन सक्ने बताइएको छ। यदि सर्वसम्मत सहमति जुट्न नसकेमा भने भोलि उम्मेदवारी आह्वान, उम्मेदवारी दर्ता तथा अन्य आवश्यक प्रक्रिया पूरा गरिनेछ।
त्यसपछि प्रत्यक्ष मतदानमार्फत नेतृत्व चयन गर्ने तयारी गरिएको छ। कार्यतालिकाअनुसार आगामी मार्च २२ तारिख बिहान १० बजे बाट प्रत्यक्ष मतदान गरिनेछ, जहाँ ५२२ जना अधिवेशन प्रतिनिधिले आफ्नो मताधिकार प्रयोग गर्दै नयाँ नेतृत्व चयन गर्नेछन्। प्रतिनिधिहरूको मतका आधारमा एनसीसी दक्षिण कोरियाको आगामी कार्यकालका लागि अध्यक्षसहित नयाँ कार्यसमिति गठन हुनेछ।
दक्षिण कोरियामा रहेका नेपालीहरूको हकहित, सामाजिक एकता तथा विभिन्न सामुदायिक गतिविधिमा सक्रिय मानिने एनसीसीको नेतृत्व चयन प्रक्रियालाई यसपटक विशेष चासोका साथ हेरिएको छ। पाँच आकांक्षीबीच देखिएको प्रतिस्पर्धाले अधिवेशनलाई थप रोचक बनाएको बताइन्छ। अब सर्वसम्मत नेतृत्व चयन हुन्छ वा प्रतिनिधिहरूको मतदानबाट नयाँ नेतृत्व टुंगिन्छ भन्ने विषयमा सबैको ध्यान केन्द्रित भएको छ।
