दक्षिण कोरियामा रहेका नेपालीहरूको साझा संस्था नेपाली सम्पर्क समिति (एनसीसी) दक्षिण कोरियाको अधिवेशन नजिकिँदै जाँदा यहाँको नेपाली समुदायमा चुनावी माहोल झन् तातिएको छ। राजधानी सोलमा आइतबार, मार्च १५ मा हुने अधिवेशनमार्फत संस्थाको नयाँ नेतृत्व चयन गरिने भएकाले प्रवासी नेपालीहरूको ध्यान अहिले एनसीसीको नेतृत्व चयनतर्फ केन्द्रित भएको छ।
यसै सन्दर्भमा एनसीसी दक्षिण कोरियाका हालका वरिष्ठ उपाध्यक्ष हर्क बिष्ट अध्यक्ष पदका बलिया दाबेदारका रूपमा उदाउनुभएको छ। लामो समयदेखि सामाजिक तथा सामुदायिक गतिविधिमा सक्रिय रहँदै आउनुभएका बिष्टको नाम अहिले नेपाली समुदायबीच व्यापक रूपमा चर्चामा रहेको देखिन्छ।
ईपीएस प्रणालीमार्फत करिब डेढ दशकअघि दक्षिण कोरिया प्रवेश गर्नुभएका बिष्टले प्रवास बसाइका क्रममा विभिन्न सामाजिक अभियान, सामुदायिक कार्यक्रम तथा सहयोगात्मक गतिविधिमा सक्रिय भूमिका निर्वाह गर्दै आउनुभएको छ। प्रवासी नेपालीहरूको हकहित, एकता र सहकार्यलाई प्राथमिकतामा राख्दै समुदायसँग नजिक भएर काम गर्ने सामाजिक अभियन्ताका रूपमा उहाँलाई चिनिन्छ।
बिष्ट सुदूरपश्चिमेलीहरूको साझा संस्था सुदूरपश्चिम समाज दक्षिण कोरियाका वरिष्ठ सल्लाहकारसमेत हुनुहुन्छ। उक्त संस्थासहित विभिन्न सामाजिक संघ–संस्थामार्फत उहाँले नेपाली समुदायबीच सहकार्य, एकता र आपसी सहयोगको वातावरण निर्माण गर्न महत्वपूर्ण योगदान दिँदै आउनुभएको सहकर्मीहरूको भनाइ छ।
मिलनसार स्वभाव, सहयोगी भावना र समन्वयकारी नेतृत्व शैलीका कारण बिष्ट प्रवासमा रहेका नेपालीहरूबीच लोकप्रिय सामाजिक व्यक्तित्वका रूपमा परिचित छन्। विभिन्न सामाजिक अभियान, राहत कार्य तथा सामुदायिक कार्यक्रमहरूमा उहाँको सक्रिय उपस्थितिले यहाँ रहेका नेपालीहरूबीच आपसी सहकार्य र एकताको भावना मजबुत बनाउन सहयोग पुगेको बताइन्छ।
आइतबार हुने एनसीसी दक्षिण कोरियाको अधिवेशनलाई यहाँका नेपालीहरूले विशेष चासोका साथ हेरिरहेका छन्। अधिवेशनबाट आउने नयाँ नेतृत्वले दक्षिण कोरियामा रहेका नेपाली समुदायको हित, एकता र सहकार्यलाई अझ मजबुत बनाउने अपेक्षा गरिएको छ। अध्यक्ष पदका आकांक्षीमध्ये हालका वरिष्ठ उपाध्यक्ष हर्क बिष्टको नाम भने अहिले समुदायमा विशेष रूपमा चर्चामा रहेको देखिन्छ।
