यही आउँदो आइतबार अर्थात् मार्च १५ सौलमा हुने नेपाली सम्पर्क समिति (NCC) को अधिवेशन नजिकिँदै जाँदा दक्षिण कोरियामा रहेका नेपाली समुदायबीच चुनावी सरगर्मी बढ्न थालेको छ। अधिवेशनमार्फत नयाँ नेतृत्व चयन हुने भएपछि अध्यक्ष पदका लागि विभिन्न व्यक्तित्वहरू आकांक्षीका रूपमा अगाडि देखिन थालेका छन्।
यसैक्रममा ईपीएस (EPS) प्रणालीमार्फत दक्षिण कोरिया प्रवेश गरी यहाँका विभिन्न सामाजिक संघ–संस्थामा सक्रिय रहँदै आउनुभएका प्रविण गिरी पनि अध्यक्ष पदका बलिया आकांक्षीका रूपमा देखिनुभएको छ।लामो समयदेखि दक्षिण कोरियामा बसोबास गर्दै नेपाली समुदायबीच सामाजिक कार्यमा सक्रिय रहँदै आउनुभएका गिरी यसअघि कास्की परिवार दक्षिण कोरियाका अध्यक्षको जिम्मेवारी सम्हालिसक्नुभएको छ। साथै उहाँ कास्की आदर्श समाज अन्तर्राष्ट्रिय समन्वय परिषदका वर्तमान सल्लाहकार तथा गण्डकी प्रदेश समाज दक्षिण कोरियाका निवर्तमान अध्यक्ष समेत हुनुहुन्छ।
सहयोगी, मिलनसार तथा कुशल नेतृत्व क्षमता भएका सामाजिक तथा बौद्धिक व्यक्तित्वका रूपमा परिचित गिरीले विभिन्न सामाजिक संघ–संस्थामार्फत नेपाली समुदायको हितमा निरन्तर योगदान दिँदै आउनुभएको बताइन्छ। दर्जनौँ सामाजिक गतिविधिमा सक्रिय सहभागिता जनाउँदै उहाँले प्रवासमा रहेका नेपालीहरूबीच सहकार्य र एकताको सन्देश फैलाउँदै आएको सहकर्मीहरू बताउँछन्।
आगामी आइतबार सम्पन्न हुन गइरहेको NCC को अधिवेशनलाई दक्षिण कोरियामा रहेका नेपाली समुदायले चासोका साथ हेरेका छन्। उक्त अधिवेशनबाट संस्थाको नयाँ नेतृत्व चयन हुने अपेक्षा गरिएको छ।
