मानवता कुनै भाषामा सीमित हुँदैन, कुनै देशमा रोकिन्न। त्यही मानवताको एउटा जीवित उदाहरण हुन् -केदार अधिकारी। दक्षिण कोरियाको व्यस्त जीवन, कामको चाप र आफ्नै संघर्षबीच पनि मानवता नछोड्ने नछोड्ने एउटा नाम हो केदार अधिकारी। मकवानपुर हेटौँडामा जन्मिएर हाल काठमाडौँ हुँदै सन् २०१० देखि ख्यङ्नामनाम्दो छाङ्वन दक्षिण कोरियालाई कर्मथलो बनाएका अधिकारीले आज कोरियामा १००औँ पटक रक्तदान गर्दै एउटा प्रेरणादायी इतिहास रचेका छन्।
पहिलो पटक कोरियामा २०१३ नोभेम्बर २० मा सुरु भएको उहाँको रक्तदान यात्रा आज केवल संख्या होइन, सयौँ जीवन बचाउने साहस र समर्पणको कथा बनेको छ। नेपालमा १७ पटक र कोरियामा १०० पटक गरी हालसम्म कुल ११७ पटक रक्तदान यो कुनै सामान्य उपलब्धि होइन, यो निस्वार्थ सेवाको उच्चतम उदाहरण हो। यो केवल अंक होइन, सयौँ जीवन बचाउने साहस, धैर्य र समर्पणको कहानी हो।
कामको व्यस्तता, पारिवारिक जिम्मेवारी र प्रवासी जीवनका चुनौतीबीच पनि उहाँले कहिल्यै मानव सेवाबाट पछि हट्नुभएन। हाल ख्यङ्नाम नेपाली समाज, दक्षिण कोरिया का सह–कोषाध्यक्षको रूपमा समेत सामाजिक सेवामा सक्रिय उहाँ धेरैका लागि आशाको प्रतीक बन्नु भएको छ।
आजको यस ऐतिहासिक अवसरमा कोरियन रेडक्रस तथा सम्बन्धित संस्थाले उहाँको दीर्घकालीन र निस्वार्थ योगदानको उच्च मूल्यांकन गर्दै विशेष सम्मान प्रदान गरेको छ।
रेडक्रसका प्रतिनिधिहरूले उहाँलाई “रगत दिने होइन, जीवन बचाउने व्यक्ति” भनेर सम्मान व्यक्त गरेका छन्। केदार अधिकारीको निरन्तर कर्म, अनुशासन र सेवाभावबाट प्रेरित भएर उहाँसँगै आएका एक साथीले आज पहिलो पटक रक्तदान गर्नुभएको छ।
