दक्षिण कोरियामा क्रियाशील नुवाकोट समाज दक्षिण कोरियाले समाजसेवी तथा काउन्सेलर माया लामा शेर्पालाई कदर पत्रसहित सम्मान गरेको छ।
कोरियामा कार्यरत नेपाली दाजुभाइ तथा दिदीबहिनीहरूलाई आफ्नो अमूल्य समय, श्रम र सीप प्रयोग गरी निरन्तर सहयोग, परामर्श, मार्गदर्शन तथा प्रेरणा प्रदान गर्दै आउनु भएको योगदानको उच्च कदर गर्दै समाजले उहाँलाई सम्मान गरेको हो।
सम्मान कार्यक्रममा बोल्दै नुवाकोट समाज दक्षिण कोरियाका प्रतिनिधिहरूले माया लामा शेर्पाले कोरियाको विभिन्न सरकारी कार्यालयहरूमा आफ्नो नियमित कामकाजसँगै आपत–विपतमा परेका नेपालीहरूलाई निःस्वार्थ भावनाका साथ सहयोग पुर्याउँदै मानवीयता, परोपकार र समाजसेवाको उत्कृष्ट उदाहरण प्रस्तुत गर्दै आउनु भएको उल्लेख गरे।
समाजले उहाँको सेवाभाव, सहकार्य र नेतृत्वले कोरियामा रहेका नेपाली समुदायलाई ठूलो हौसला र भरोसा प्रदान गरेको भन्दै आगामी दिनमा पनि यस्ता सकारात्मक कार्यहरू निरन्तर रहने विश्वास व्यक्त गरेको छ।
सम्मानित माया लामा शेर्पाले नुवाकोट समाज दक्षिण कोरियाप्रति धन्यवाद व्यक्त गर्दै प्रवासी भूमिमा रहेका नेपालीहरूको सेवा र सहयोगलाई अझ प्रभावकारी बनाउँदै लैजाने प्रतिबद्धता व्यक्त गर्नुभयो।
