जङ्गलमा २४ घण्टाभन्दा बढी हराएकी ७७ वर्षीया वृद्धालाई एक नेपाली श्रमिकले भेटी उद्धार गरेपछि उनको योगदानप्रति स्थानीयबासीदेखि परिवारजनसम्मले प्रशंसा गरेका छन्।
गत सेप्टेम्बर ३० तारिख साँझ ६:३८ बजे इनजे खिरिनम्योन सेरि गाउँस्थित डाँडामा गएकी वृद्धा हराएपछि परिवारले प्रहरीमा उजुरी गरेका थिए। प्रहरी र उद्धारकर्मीहरूले व्यापक खोजी गरे पनि तत्काल भेटाउन सकेका थिएनन्। वृद्धा डिमेन्सियाबाट पीडित भएकाले स्वयम् फर्किन असम्भवजस्तै देखिएको थियो।
तर करिब २४ घण्टापछि, अक्टोबर १ तारिख साँझ ५:३० बजे, सोही क्षेत्रमा बस्दै आएका ३३ वर्षीय नेपाली श्रमिक विसाल खरेलले असामान्य आवाज सुनेपछि शंका गर्दै जङ्गलतर्फ खोजी थाले। कार्यस्थल नजिकै कुकुर असामान्य रूपमा भुकिरहेको देखेर उनी तत्कालै डाँडातर्फ पुगे र काँपिरहेको अवस्थामा वृद्धालाई भेटे।
विशालले फलामे भर्याङ प्रयोग गरी वृद्धालाई करिब १५० मिटर टाढा रहेको श्रमिक आवाससम्म पुर्याए। उनले वृद्धालाई पानी र रोटी खुवाउँदै तत्कालै ११९ मा सम्पर्क गरी उद्धार टोलीलाई जानकारी गराएका थिए।
वृद्धा सुरक्षित भेटिएको समाचारपछि परिवारजनले विसाललाई बारम्बार धन्यवाद दिएका थिए। विसालले भने, “उहाँ हराउनुभएको थाहा पाएदेखि नै निरन्तर चिन्ता लागेको थियो। ज्यान जोगिनु भयो भन्नेमा खुसी लाग्छ।”
स्थानीयहरूले समेत नेपाली श्रमिकको मानवीयताको प्रशंसा गर्दै धन्यवाद ज्ञापन गरेका छन्।
