मङगेन्ना इन्टरटेन्मेन्टको सबै कार्यक्रम अनिश्चितकालका लागि स्थगित, वीरगति प्राप्त युवाप्रति श्रद्धाञ्जली
नेपालमा जेन–जी पुस्ताको नेतृत्वमा भएको भ्रष्टाचारविरुद्धको ऐतिहासिक आन्दोलनका क्रममा वीरगति प्राप्त युवाप्रति गहिरो श्रद्धाञ्जली अर्पण गर्दै दक्षिण कोरियास्थित Mangenna Entertainment ले आफ्ना सम्पूर्ण आगामी कार्यक्रमहरु अनिश्चितकालका लागि स्थगित गर्ने घोषणा गरेको छ।
संस्थाले एक विज्ञप्ति जारी गर्दै भनेको छ —
“नेपालको वर्तमान परिस्थितिलाई मध्यनजर गर्दै हामी प्रवासमा भए पनि मातृभूमिमा घटेको यस दुःखद घटनामा सहानुभूति व्यक्त गर्दै वीरगति प्राप्त युवाहरुको आत्माको चिरशान्तिको कामना गर्दछौं। त्यसकारण, आगामी एक महिनाभित्र कुनै पनि मनोरञ्जनात्मक कार्यक्रम वा उत्सव आयोजना नगर्ने निर्णय गरिएको छ।”
यस निर्णयअनुसार, सेप्टेम्बर २१ मा तय भएको नेपाली चलचित्र “जारी२” को सुवन र फाजु सो प्रदर्शन र अक्टोबर ४ मा आयोजना गर्न लागेको “Mangenna Night Party” दुबै कार्यक्रम अनिश्चितकालका लागि स्थगित गरिएको जनाइएको छ।
संस्थाले दर्शक, कलाकार, समर्थक तथा सम्पूर्ण शुभेच्छुकप्रति क्षमायाचना गर्दै परिस्थितिको सुधारसँगै कार्यक्रमका नयाँ मिति तय हुने जानकारी गराएको छ। साथै, “हामी नेपाली कला र संस्कृतिको संरक्षण र प्रवर्द्धनमा निरन्तर प्रतिबद्ध छौं” भन्ने प्रतिबद्धतासमेत दोहोर्याएको छ।
