नेपाली जनसम्पर्क समिति, दक्षिण कोरियाले क्रियाशील सदस्यता दर्ताका लागि औपचारिक आह्वान गरेको छ। नेपालको प्रजातान्त्रिक आन्दोलनको ऐतिहासिक विरासत बोकेको नेपाली कांग्रेसप्रति आस्था राख्ने सम्पूर्ण नेपालीलाई समितिले लोकतान्त्रिक मूल्य–मान्यताको सुदृढीकरणका लागि यो अभियानमा सहभागी हुन आग्रह गरेको हो।
समितिका सभापति भजिन्द्र बहादुर क्षेत्रीले कोरियामा रहेका नेपालीलाई सुव्यवस्थित र संगठित गर्दै उनीहरूको समस्यामा सामूहिक आवाज उठाउने उद्देश्य यस अभियानको मुख्य आधार रहेको बताए। उनले भने, “क्रियाशील सदस्यताले प्रवासी नेपालीलाई राष्ट्रिय नीति निर्माणको प्रक्रियामा प्रत्यक्ष सहभागी हुने वैधानिक अधिकार दिलाउँछ। व्यक्तिगत स्वार्थ मात्र नभई समग्र प्रवासी नेपाली समुदायको हितका लागि हामी निर्णायक भूमिका निर्वाह गर्दै आएका छौं।”
समितिले क्रियाशील सदस्यताबाट प्राप्त हुने प्रमुख लाभहरूमा सशक्त सामाजिक तथा व्यावसायिक नेटवर्क, नेपालको राजनीतिक नेतृत्वमा प्रत्यक्ष पहुँच, व्यक्तित्व र नेतृत्व क्षमताको विकास, र प्रवासमै रही नेपालको लोकतान्त्रिक आन्दोलनलाई थप सशक्त बनाउने अवसरलाई उल्लेख गरेको छ।
यस अभियानलाई संगठनात्मक विस्तार मात्र नभई राष्ट्रप्रतिको अटल प्रतिबद्धता र नयाँ पुस्तालाई संगठित गर्ने बृहत् महाअभियानको रूपमा अघि बढाइएको समितिले जनाएको छ। इच्छुक नेपाली काङ्ग्रेस समर्थकहरूले तोकिएका मापदण्ड पूरा गरी दुई महिनाभित्र आवेदन दर्ता गर्न सक्ने समितिले स्मरण गराएको छ।
👉 आवेदनका लागि आवश्यक विवरण र गूगल फाराम लिंक समितिले सार्वजनिक सूचना मार्फत उपलब्ध गराएको छ।
