दक्षिण कोरियामा आगामी वर्षदेखि स्वास्थ्य बीमा शुल्क बढ्ने भएको छ। सरकारले बीमा प्रिमियम दरलाई हालको ७.०९ प्रतिशतबाट बढाएर ७.१९ प्रतिशत पुर्याउने निर्णय गरेको हो।
दक्षिण कोरियाको स्वास्थ्य तथा कल्याण मन्त्रालयले अगस्ट २८ मा बसेको १५औं स्वास्थ्य बीमा नीतिसमिति बैठकमार्फत उक्त निर्णय गरेको हो। यो वृद्धि ३ वर्षपछि पहिलोपटक गरिएको हो।
कति बढ्छ?
नयाँ निर्णयअनुसार रोजगारीमा रहेका कर्मचारीले तिर्नुपर्ने मासिक औसत व्यक्तिगत बीमा शुल्क १,५८,४६४ वोनबाट बढेर १,६०,६९९ वोन पुग्नेछ। यसरी प्रत्येक महिनामा करिब २,२३५ वोन थपिने भएको छ।
कर्मचारीहरूको बीमा शुल्क भने पहिलेझैँ मजदुर र रोजगारदाताले समान रूपमा आधा–आधा तिर्नुपर्ने व्यवस्था यथावत रहनेछ।
विगतका दर
• २०२१ मा : २.८९% वृद्धि
• २०२२ मा : १.८९% वृद्धि
• २०२३ मा : १.४९% वृद्धि
• २०२३ र २०२४ मा स्थिर (७.०९%)
• २०२५ मा : १.४८% वृद्धि (७.१९%)
विशेष तथ्य
२००० सालपछि स्वास्थ्य बीमा शुल्क दर २००९, २०१७ र पछिल्ला दुई वर्ष (२०२३–२४) गरी जम्मा चारपटक मात्रै स्थिर गरिएको छ। लगातार दुई वर्ष स्थिर राखिएको भने यो पहिलोपटक हो।
