विशाल आवाज:दक्षिण कोरियामा सक्रिय संस्थाहरूको माउ सस्था भनेर चिनिने नेपाली सम्पर्क समिति, दक्षिण कोरियाले आउँदो अगस्ट १७ तारिख सौलमा विधान संशोधन सम्बन्धी बृहत् भेला गर्ने भएको छ।
“दक्षिण कोरियामा रहेका सङ्घसंस्थाहरूबीच एकता र सहकार्यका लागि पहल” गर्ने उद्देश्यका साथ सन् १९९३ मा स्थापित नेपाली सम्पर्क समिति, दक्षिण कोरियाले यही आउँदो अगस्ट १७ तारिख आइतबारका दिन बिहान ठिक ११ बजे सौल स्थित 종로구 창신길 51(창신동) 5 충,총로중 앙세마울 금고 मा ‘विधान संशोधन सम्बन्धी बृहत् भेला’ आयोजना गर्ने भएको हो। संगठनको कार्यदिशा स्पष्ट पार्न र संस्थागत संरचनामा आवश्यक सुधार ल्याउन यो कार्यक्रम आयोजना गरिएको हो।
सम्पर्क समितिले कोरियामा क्रियाशील सम्पूर्ण नेपाली संघ–संस्था, सामाजिक अभियन्ता, बुद्धिजीवी, व्यवसायी तथा श्रमिक समुदायका प्रतिनिधिहरूलाई निसंकोच उपस्थित भई संस्थाको भविष्यको दिशानिर्देशनमा सक्रिय सहभागिता जनाउन आह्वान गरेको छ। कार्यक्रममा संविधान संशोधन, संगठनात्मक पुनर्संरचना, र भावी कार्ययोजना सम्बन्धी महत्वपूर्ण विषयहरूमा बहस–संवाद हुनेछ। डा. एकराज बरालको संयोजकत्व तथा सदस्य सचिव दीपक थापा मगर रहेको विधान संशोधन समितिमा भवानीप्रसाद (बिपि पौड्याल), धर्मराज तिवारी, हर्क विष्ट, ईश्वर धामी, ओमलाल ओली, प्रविण गिरी, किरण बन्जाडे, केदार निरौला र हरिप्रसाद खनाल रहेको छ।
