गायिका नपुगेपछि टिकटको पैसा फिर्ता माग्दै दर्शकहरुले गरे नाराबाजी
आफ्नो प्रस्तुतिका कारण आलोचित र विवादित बन्दै आएकी लोकदोहोरी गायिका ज्योति मगरको प्रस्तुतिमा सहभागी नहुने भन्दै अर्घाखाँचीमा विभिन्न १० संस्थाले संयुक्त विज्ञप्ति जारी गरेका छन् ।
माघ ५ गतेदेखि जारी पाँचौं अर्घाखाँची महोत्सवमा हिजो (शनिवार) मुख्य आकर्षकका रुपमा ज्योति मगरको प्रस्तुति तय थियो ।
उनी आउने तय भएपछि राष्ट्रिय लोक तथा दोहोरीगीत प्रतिष्ठान, अर्घाखाँची लगायतका विभिन्न १० संस्थाले संयुक्त विज्ञप्ति जारी गर्दै ज्योतिको प्रस्तुतिमा आफूहरू सहभागी नहुने घोषणा गरेका हुन् ।
‘ज्योति मगर मिठो स्वर भएकी लामो समयदेखि कला साधनामा लागेकी हाम्रै नेपाली चेली हुन् । यसमा हामीलाई गौरव छ । उनले कला क्षेत्रमा गरेको संघर्षको उच्च सम्मान गर्दछौं’ विज्ञप्तिमा भनिएको छ, ‘तरपनि प्रत्येक मेला महोत्सव, सांस्कृतिक कार्यक्रममा उनले गाउने गीत र नृत्यले नेपाली मौलिक कला, संस्कृतिको पक्षमा सुखद् सन्देश दिन नसकेको हामी सबैलाई विदितै छ ।’
गायिका मगरलाई बारम्बार उचित सुझाव दिइरहँदा पनि सुझाव ग्रहण नगर्नु र नेपाली संस्कृतिमाथि विकृति फैलाउनु समग्र कला क्षेत्रकै दुखद पक्ष भएको विज्ञप्तिमा भनिएको छ ।
विज्ञप्तिमा अगाडि लेखिएको छ, ‘त्यसैले उनको कला प्रस्तुतिमाथि हाम्रो गम्भीर ध्यानाकर्षण भएको छ । हामीले नेपाली मौलिक कला संस्कृति बचाउन यी र यस्ता कार्यहरुको विरोध गर्दै आज सन्धिखर्कबाट हुन सक्ने असभ्य प्रस्तुतिमा सहभागी नहुने ब्यहोरा अवगत गराउँछौं ।’
गायिका ज्योति शनिवार अर्घाखाँची महोत्सवमा सहभागी भने हुन सकिनन् । मौसमको खराबीका कारण फ्लाइट हुन नसक्दा आफू शनिवार अर्घाखाँची पुन नसकेको उनले बताएकी छिन् । उनको प्रस्तुति अब सोमबारका लागि तय भएको छ । शनिवार महोत्सवमा ज्योति उपस्थित नभएपछि टिकट काटेका स्रोता दर्शकहरुले पैसा फिर्ता माग्दै नाराबाजी गरेका थिए ।
