नेपालमा विवाह, व्रतबन्ध लगायत विभिन्न शुभ कार्यहरूमा नौमती बाजा घन्किएको हामीले देख्दै सुन्दै आइरहेकै हौ। यस्तै पछिल्लो समय दक्षिण कोरियाको छल्लानाम्दो प्रान्त स्थित मोक्पो क्षेत्रमा हुने विभिन्न साँस्कृतिक बिबिधता झल्किने कार्यक्रम लगायत नेपाली चाडपर्व तथा उत्सवहरुमा समेत नेपाली नौमती बाजा घन्किएको देख्न सकिन्छ। बुट्टा सहितको ढाकाको टोपी , ढाकाकै इस्टकोट, चट्ट नेपाली दाउरा सुरुवाल लगाएर युवा उमेर समूहका उनीहरू हातमा नर्सिङ्गा, सहनाई, दमाहा, झ्याली,ढोलक, ट्याम्को ,ढोलक,कर्नाल हातमा लिएर विभिन्न कार्यक्रमहरूमा घन्काइरहेका हुन्छन्।
पछिल्लो समय कोरियामा पनि यङ्आमगुन स्थित हुन्डाइ साम्हो सीप बिल्डिङ कम्पनीमा कार्यरत १० जना नेपालीहरुको जोसिलो टोलिले अत्यन्तै मेहनतका साथ नौमती बाजा सिकि विभिन्न कार्यक्रमहरूमा नौमती बाजा प्रस्तुत गर्दै आएका छन्। आफ्नो कार्यव्यस्तताको वावजुद पनि मेहनत गरि अभ्यास गरेकोले बाजा भित्र्याएको केही समयमा नै पारंगत बनेका उनिहरु कोरियाका अन्य ठाउँबाट प्रस्तुतिको लागि आग्रह आए स्विकार्न सकिने कार्यक्रम संयोजक एन्जि शेर्पा बताउँछन् ।
करिब १५०० को हाराहारिमा नेपाली समुदाय वसोवास गर्ने उक्त क्षेत्रमा सबै नेपालीको साझा संस्था मोक्पो साम्हो साझा चौतारीले बाजा संरक्षण तथा ब्यवस्थापन गर्दै आएकोमा नौमती बाजाले आफ्नो क्षेत्रमा कोरियन तथा अन्य समुदायको बिचमा छुट्टै पहिचान बनाएकोमा गौरव महसुस गर्ने गरिरहेको संस्था अध्यक्ष रिक्की गुरुङ बताउनुहुन्छ।
नौमती बाजा नौ वटा बाजाहरूको सामूहिक बाजा हो ।यो पञ्चैबाजाको ठूलो रूप हो जसमा चार वटा अरू बाजाहरू थपिएको हुन्छ। यस अन्तर्गत दमाहा, झ्याली, ट्याम्को, ढोलक, सहनाई, कर्नाल, नरसिङ्गा बाजा हुन्छन् जसमा सहनाई र दमाहाका दुई-दुई वटा हुन्छन्। सहनाई र नरसिङ्गा फुकेर, ठूलो दमाहा, सानो दमाहा, ढोलक र ट्याम्को ठोकेर तथा झ्याम्टा र मुजुरा एक आपसमा जुधाएर बजाइन्छ। नौ जना वाद्यवादक लोककलाकारहरूले सुर र ताल मिलाएर एकैपटक बजाउने गरेकाले यो वाद्यसमूहलाई नौमती बाजा भनिएको हो।
