२०२४ मा खन्गाङ फोहमको रकम वृद्धी नहुने
आगामी बर्ष अर्थात सन् २०२४ का लागी कोरियाको स्वास्थ्यबिमाको रकम बृद्धी नहुने भएको छ । कोरियन नागरिक तथा ६ महिनाभन्दा बढी समय कोरियामा बस्ने विदेशीले समेत अनिवार्य दर्ता गर्नुपर्ने खन्गाङफोहम अर्थात स्वास्थ्य बिमाको रकम यसअघि लगातार ७ बर्षसम्म बढीरहेको थियो ।
कोरियाको स्वास्थ्य मन्त्रालयमा आज बसेको स्वास्थ्य विमा नितीको समिक्षा बैठकले बिमा रकम यथावत राख्ने निर्णय गरेको हो । आर्थिक अवस्था, मुद्रास्फिर्तीको अवस्था, बढ्दो ब्याजदर लगायत अन्य पक्षलाइ ध्यानमा राखेर बिमा रकम यथावत राख्ने निर्णय गरेको जनाइएको छ ।
हाल न्युनतम मासिक ज्यालाको ७.०९ प्रतिशत अर्थात १ लाख ४६ हजार ७१२ वन औसत मासिक प्रिमियम तिर्नुपर्दछ ।
कोरियाको राष्ट्रिय स्वास्थ्य परिषदले सामान्यतया जुन र अगस्चको बिचमा आगामी बर्षको स्वास्थ्यबिमाको प्रिमियम दर निर्धारण गर्दछ । तर यसपटक सन् २०१२ पछी पहिलोपटक ढिला गरी दर निर्धारण गरिएको छ ।
बिमा रकम नबढ्नुको अर्को कारण स्वास्थ्य बिमाको सञ्चिती रकमको पर्याप्तता पनि हो । स्वास्थ्य बिमामा हाल २३.९ ट्रिलियन वनको सञ्चिती रहेको छ ।
यसका साथै आज बसेको बैठकले स्वास्थ्यबिमा सुधारमा बारेमा पनि केही नितीहरु सार्वजनिक गरेको छ । अल्पकालिन र दिर्घकालिन गरी छुट्टाइएका नितीहरुले नागरिकको स्वास्थ्य सेवा थप प्रभावकारी हुने विश्वास लिइएको छ । कोरियामा बिमा रकम नबढाइएको यो तेस्रो पटक हो । यसअघी २००९ र २०१७ मा यथावत राखेको थियो, नत्र हरेक बर्ष बृद्धी हुँदै आएको थियो ।
