प्रमोद गिरी हिरोसिमा। निप्पोन फाउन्डेसनले गरेको सर्वेक्षण अनुसार जापानका झण्डै आधा युवाहरूले आत्महत्या गर्ने विचार राखेका छन् । ती उत्तरदाताहरूमध्ये अधिकांशले आफूले आफ्नो भावनाको बारेमा कसैसँग कुरा नगरेको बताएका छन् ।
नोभेम्बरमा १८ देखि २९ वर्ष उमेर समूहका ५ लाख १ हजार १८ जनासँग प्रतिक्रिया खोजेको र १४ हजार ८१९ जनाबाट वैध प्रतिक्रिया प्राप्त गरेको सर्वेक्षणमा आधारित उक्त प्रतिवेदन गत महिना सार्वजनिक गरिएको थियो | आत्महत्या गर्ने सोच भएका मध्ये ५६ दशमलव ६ प्रतिशतले कसैसँग कुरा नगरेको पाइएको थियो । जबकि १२.४ प्रतिशत मानिसहरूले भने कि तिनीहरू साथीहरू र ११.७ प्रतिशतले आफ्ना आमाहरूलाई आफ्ना भावना खोल्ने गरेका छन् । आधाभन्दा बढी उत्तरदाताहरू आत्महत्या गर्ने विचार भएकाहरूलाई मद्दत गर्ने संस्था वा सहायता समूहहरूबारे नै अनभिज्ञ रहेको पाइएको छ ।
समग्रमा, प्रतिवेदनले देखाएको छ कि ४४.८ प्रतिशत उत्तरदाताहरूले आत्महत्याको विचारको अनुभव गरेका थिए ।अरूसँगको सम्बन्धमा कठिनाइहरू, धम्की र उनीहरूको भविष्यको रोजगारी वा शैक्षिक सम्भावनाहरूको बारेमा चिन्ताको कारण आत्महत्याको भाव र अरुसँग भावना नसाट्ने मुख्य कारण पाइएको छ । आत्महत्या गर्ने विचार भएकाहरूमध्ये ४०.८ प्रतिशतले आफूले आफ्नो ज्यान लिन तयार रहेको वा प्रयास गरेको बताएका छन् ।
