नेपाल फुटबल महासंघ दक्षिण कोरिया (NFFSK) को आयोजनामा अक्टोबर १८, २०२६ मा दक्षिण कोरियाको इक्सान सहरमा सम्पन्न प्रथम दसैँ भेट्रान सेभेन–ए–साइड फुटबल प्रतियोगिताको उपाधि इक्सान NFC ले जितेको छ। प्रतियोगितामा ब्लु लायन FC उपविजेता बनेको छ।
प्रवासी भूमिमा नेपाली फुटबलको विकास, आपसी एकता, सद्भाव र भाइचारा अभिवृद्धि गर्ने उद्देश्यले आयोजित प्रतियोगिता उत्साहपूर्ण वातावरणमा सम्पन्न भएको आयोजकले जनाएको छ। प्रतियोगितामा सहभागी क्लब तथा खेलाडीहरूले अनुशासन र खेलभावनासहित प्रतिस्पर्धा गरेका थिए।
प्रतियोगितामा व्यक्तिगत विधातर्फ इक्सान NFC का सुरज बुढाथोकीले उत्कृष्ट गोलकिपरको अवार्ड प्राप्त गरे भने सोही क्लबका विजय जङ्ग कार्की सर्वाधिक गोलकर्ता बने। त्यसैगरी, ब्लु लायन FC का सुमन पाख्रिन उत्कृष्ट डिफेन्डर घोषित भए भने इक्सान NFC का राज थापा श्रेष्ठले उत्कृष्ट खेलाडी (MVP) को अवार्ड जिते।
प्रतियोगिता सफलतापूर्वक सम्पन्न गर्न सहयोग पुर्याउने प्रायोजक, सहयोगदाता, रेफ्री, सहायक रेफ्री, स्वयंसेवक तथा आयोजक सदस्यहरूप्रति NFFSK ले आभार व्यक्त गरेको छ। प्रतियोगिताको मुख्य प्रायोजकका रूपमा रारा रेस्टुरेन्ट, इक्सानले सहयोग गरेको थियो। सह–प्रायोजकका रूपमा JB बैंकका लोन परामर्शदाता हरिप्रसाद भट्टराई र GME Remittance का रेमिटेन्स प्रबन्धक सन्दीप थापाले आर्थिक सहयोग गरेका थिए। त्यस्तै, नीता राईले खानेपानी सहयोग उपलब्ध गराएकी थिइन्।
प्रतियोगितालाई निष्पक्ष र व्यवस्थित रूपमा सञ्चालन गर्न ANFA बाट मान्यता प्राप्त नेपाली रेफ्री विज्ञान प्रसाई, विशाल राई र अर्जुन राईले भूमिका निर्वाह गरेका थिए। सहायक रेफ्रीका रूपमा नीरज जङ्ग कार्की र शंकर गुरुङले सहयोग गरेका थिए।
त्यसैगरी, प्रतियोगिताको व्यवस्थापनमा स्वयंसेवकका रूपमा खटिएका सुवन NFC का रुपक नेपाली, सुजल खत्री, सञ्जीव राई र सोम घलेलगायत आयोजकका पदाधिकारी, सदस्य तथा अन्य सहयोगीहरूप्रति पनि महासंघले धन्यवाद व्यक्त गरेको छ।
NFFSK ले प्रतियोगितामा सहभागी सम्पूर्ण क्लब, खेलाडी, अतिथि, शुभचिन्तक तथा सहयोगदाताको साथ र सहयोगले कार्यक्रम सफल भएको उल्लेख गर्दै आगामी दिनमा पनि प्रवासी नेपाली समुदायबीच फुटबलको विकास र आपसी सद्भाव मजबुत बनाउन सहकार्य जारी रहने विश्वास व्यक्त गरेको छ।









