दक्षिण कोरियामा रहेका प्रवासी नेपालीबीच लोकसंस्कृतिको संरक्षण तथा सामाजिक सेवाको उद्देश्यसहित नेपाल गोरखा परिवार, दक्षिण कोरियाले ‘खुल्ला लोकदोहोरी प्रतियोगिता–२०२६’ आयोजना गर्ने भएको छ। आगामी अगस्ट १६ तारिख मा फेन्थेकस्थित निरामाया दोहोरी साँझको हलमा हुने प्रतियोगिताका लागि आवेदन खुला गरिएको आयोजकले जनाएको छ।
प्रतियोगितामा प्रथम हुने टोलीले ८ लाख कोरियन वन, द्वितीय हुने टोलीले ४ लाख वन तथा तृतीय हुने टोलीले ३ लाख वन नगद पुरस्कार प्राप्त गर्नेछन्। कार्यक्रममा चर्चित लोकगायक दिनेश थापा प्रस्तोताका रूपमा तथा लोकप्रिय गायक सूर्य खड्का निर्णायकका रूपमा सहभागी रहनेछन्।
कार्यक्रमको प्रवेश शुल्क ३५ हजार वन (खानासहित) तथा दोहोरी टिम दर्ता शुल्क ५० हजार वन तोकिएको छ। महिला वा पुरुष जोसुकैले पनि एकल रूपमा सहभागिता जनाउन सक्नेछन्। भाका मिलाउने साथी नभए आयोजकले आवश्यक व्यवस्थापन गर्ने जनाएको छ। कार्यक्रमबाट संकलित रकम नेपालका विकट क्षेत्रका विद्यालयहरूमा शैक्षिक सामग्री सहयोगका लागि प्रयोग गरिने जनाइएको छ। दक्षिण कोरियामा रहेका लोकदोहोरी पारखी तथा नेपाली समुदायलाई प्रतियोगितामा सहभागिता जनाई कार्यक्रम सफल बनाउन आयोजकले आग्रह गरेको छ।
