सलनाल विशेष ‘बुलबुले डान्स पार्टी’पछि सुर्खेत समाजद्वारा आर्थिक विवरण सार्वजनिक, ९२ लाखभन्दा बढी बचत
सुर्खेत समाज दक्षिण कोरियाले कोरियन नयाँ वर्ष सलनालको अवसरमा आयोजना गरेको ‘बुलबुले डान्स पार्टी’ कार्यक्रमको आर्थिक विवरण सार्वजनिक गरेको छ।
समाजले २०२६ मार्च २२ मा सार्वजनिक गरेको विवरणअनुसार उक्त कार्यक्रमबाट ९२ लाख वनभन्दा बढी रकम बचत भएको उल्लेख गरिएको छ। कार्यक्रममार्फत संकलित रकम तथा खर्चको पूर्ण विवरण भर्चुअल बैठकमार्फत सार्वजनिक गरिएको समाजले जनाएको छ।
फेब्रुअरी १५ मा आयोजना गरिएको उक्त कार्यक्रम नेपाली समुदायबीच सांस्कृतिक एकता, मनोरञ्जन तथा सामाजिक सहयोगको उद्देश्यसहित सम्पन्न भएको थियो। कार्यक्रममा कलाकारहरूको प्रस्तुति, सांगीतिक कार्यक्रम तथा विभिन्न मनोरञ्जनात्मक गतिविधिहरू समावेश गरिएको थियो।
समाजका अनुसार कार्यक्रमबाट प्राप्त बचत रकम फेङ्थेक क्षेत्रमा सञ्चालनमा रहेको सेल्टर (आवास गृह) को दीगो व्यवस्थापन तथा सुदृढीकरणमा प्रयोग गरिनेछ।
कार्यक्रम सफल बनाउन आर्थिक, भौतिक तथा नैतिक रूपमा सहयोग गर्ने सम्पूर्ण व्यक्ति तथा संघसंस्थाप्रति समाजले धन्यवाद ज्ञापन गरेको छ।
