दक्षिण कोरियामा रहेका नेपाली साहित्यप्रेमीहरूका लागि एक महत्वपूर्ण साहित्यिक कार्यक्रम ‘बृहत साहित्य मेला २०२६’ आयोजना हुने भएको छ। नेपाल मुक्तक प्रतिष्ठान, दक्षिण कोरिया शाखाको आयोजनामा हुने उक्त कार्यक्रम नेपाली भाषा, साहित्यको विकास र विस्तार गर्ने उद्देश्यका साथ सञ्चालन गर्न लागिएको हो।
आयोजकका अनुसार कार्यक्रम फेब्रुअरी १७ तारिखका दिन दिउँसो १२:३० बजेबाट दोङ्देमुनस्थित शुभेच्छा रेष्टुरेन्टको हलमा आयोजना हुनेछ।
कार्यक्रममा मुक्तक, गजल तथा कविता वाचनसँगै दमदार साहित्यिक प्रस्तुतिहरू रहनेछन्। विशेष प्रस्तोताका रूपमा चर्चित साहित्यकारहरू सेसेफुङ शेर्मा, रामचन्द्र शर्मा ,भीषण माइलाको सशक्त प्रस्तुति रहने आयोजकले जनाएको छ। साथै अन्य साहित्यकारहरूको समेत सहभागिता रहनेछ।
नेपाल मुक्तक प्रतिष्ठान कोरियाले यस कार्यक्रमलाई भव्य र सफल बनाउन कोरियामा रहेका सम्पूर्ण साहित्यिक मनहरूलाई उपस्थितिका लागि हार्दिक निमन्त्रणा गरेको छ। आयोजकले जानकारी गराएअनुसार सम्बन्धित सबैलाई औपचारिक निमन्त्रणा पत्र पठाइसकिएको छ। कारणवश पत्र प्राप्त नभएको अवस्थामा यसै सूचनालाई आधार मानी कार्यक्रममा सहभागी भइदिन अनुरोध गरिएको छ।
नेपाली साहित्यप्रति रुचि राख्ने कोरियावासी नेपालीहरूका लागि यो कार्यक्रम साहित्यिक भेटघाट, सृजनात्मक आदान–प्रदान र सांस्कृतिक एकताको महत्वपूर्ण अवसर हुने विश्वास आयोजकको छ।
