दक्षिण कोरियामा रहेका नेपाली संगीतप्रेमीहरूका लागि लोकप्रिय ब्याण्ड ‘जोन एन्ड दि लोकल्स’ ले सउलमा भव्य लाइभ कन्सर्ट प्रस्तुत गर्ने भएको छ। धराने इभेन्ट्स कोरिया को आयोजनामा कोरियाली नयाँ वर्ष सलनाल को अवसर पारेर यही फेब्रुअरी १७ (मंगलबार) विशेष सांगीतिक कार्यक्रम आयोजना हुन लागेको हो।
‘जोन एन्ड दि लोकल्स’ को साउथ कोरिया टुर अन्तर्गत हुने यो कन्सर्ट सउल नजिकै रहेको माङ्वोल्सा स्टेशन (लाइन नम्बर १) गेट नम्बर ४ नजिकैको सिन्हान विश्वविद्यालय (신한대학교) परिसरमा आयोजना गरिने आयोजकले जनाएको छ। कार्यक्रम हलमा प्रवेश दिउँसो ३ बजेदेखि खुला हुनेछ भने कन्सर्टका लागि टिकट शुल्क ५० हजार कोरियन वन तोकिएको छ।
कार्यक्रममा मुख्य आकर्षणका रूपमा जोन एन्ड दि लोकल्स को लाइभ प्रस्तुति रहनेछ भने ओपनिङ ब्याण्डका रूपमा चर्चित समूह ‘फुल्याङ’ ले दर्शकलाई तताउनेछ। कार्यक्रमको सञ्चालन रेश्मा राई ले गर्नेछिन् भने डिजे आरएक्स (DJ RX) ले आफ्नो दमदार बिटमार्फत माहोल झनै रोमाञ्चक बनाउनेछन्।
दर्शकहरूको सुविधालाई मध्यनजर गर्दै आयोजकले दोङ्देमुन स्टेशनको गेट नम्बर २ र ३ बाट कार्यक्रम स्थलसम्म निःशुल्क शटल बसको व्यवस्था समेत गरिएको जानकारी दिएको छ।
दक्षिण कोरिया टुर अन्तर्गत आयोजना हुन लागेको यो कन्सर्टलाई कोरियामा रहेका नेपाली समुदायबीच अत्यन्तै प्रतीक्षित सांगीतिक कार्यक्रम का रूपमा हेरिएको छ। कन्सर्टको अनलाइन टिकटिङ पार्टनर ‘जिमनी ट्रान्स (GMoney Trans)’ रहेको छ, जहाँबाट दर्शकहरूले सहजै टिकट प्राप्त गर्न सक्नेछन्।
कार्यक्रम सफल बनाउन विभिन्न संघ–संस्था, व्यवसायिक प्रतिष्ठान तथा सञ्चारमाध्यमहरूको व्यापक सहकार्य रहेको आयोजकले जनाएको छ। आयोजकले दक्षिण कोरियामा रहेका सम्पूर्ण नेपाली युवायुवती तथा संगीतप्रेमीहरूलाई कार्यक्रममा उपस्थित भई नेपाली लाइभ संगीतको भरपूर आनन्द लिन आग्रह गरेको छ।
