दक्षिण कोरियाको जेजु सिटीमा रहेको दुई तले अस्थायी गोदाम भवनमा आगलागी हुँदा दोस्रो तलामा बसोबास गर्दै आएकी २० वर्षीया महिलाको मृत्यु भएको छ।
जेजु अग्नि तथा विपद् व्यवस्थापन मुख्यालयका अनुसार जनवरी ३० दिउँसो करिब २:१२ बजे जेजु सिटीको दो–र्योनदोंग क्षेत्रमा रहेको गोडाममा आगलागी भएको सूचना प्राप्त भएको थियो। आगो लागेसँगै कालो धुवाँ तीव्र रूपमा फैलिँदा 119 आपतकालीन सेवामा २६ वटा फोन आएको जनाइएको छ।
दमकल विभागले भारी उपकरण र ‘हनल्लामे’ नामक हेलिकप्टरसहित ठूलो संख्यामा दमकलकर्मी परिचालन गरी आगो नियन्त्रणमा लिने प्रयास गरेको थियो। करिब साढे तीन घण्टाको कठिन प्रयासपछि साँझ ५:५५ बजे आगो पूर्ण रूपमा नियन्त्रणमा लिइएको हो।
घटनास्थलको दोस्रो तलाबाट ती महिलालाई मृत अवस्थामा फेला पारिएको थियो। स्यान्डविच प्यानलबाट निर्माण गरिएको उक्त भवनको पहिलो तला सुन्तला भण्डारण गोदामका रूपमा प्रयोग हुँदै आएको थियो भने दोस्रो तला आवासीय प्रयोजनमा प्रयोग भइरहेको थियो।
हाल प्रहरी र दमकल विभागले आगलागीको कारण तथा महिलाको मृत्युको वास्तविक कारण पत्ता लगाउन विस्तृत अनुसन्धान गरिरहेका छन्।
