विशाल श्रेष्ठ/दक्षिण कोरिया: “युवाहरुको एकता, नयाँ सोचको अवधारणा समृद्धिको चाहना” भन्ने मुल नाराका साथ सन् २०१७ मा स्थापित “न्यु भिजन ग्रुप दक्षिण कोरिया” इलाममा रहेको विद्यालय मा शैक्षिक सामाग्री वितरण गरेको छ ।
ग्रुपले गत छुसकमा आयोजना गरेको डान्स पार्टिको उद्देश्य अनुरुप पहिलो चरणको सहयोग कार्यक्रम इलाम जिल्ला सुनपा १ सानोवांगिन स्थित भगवति आधारभुत विद्यालयमा अध्यनरत विद्यार्थीहरूलाई शैक्षिक सामाग्री वितरण गरेको हो । फाल्गुन ७ गते आईतबार प्रजातन्त्र दिवसको अवसर पारेर एक विशेष कार्यक्रम द्वारा उक्त विद्यालयमा अध्ययनरत छात्र छात्राहरुलाई झोला,जमेट्री बक्स, पेन्सिल सेट, कापी, रंगपेन्सिल लगायतका शैक्षिक सामाग्री वितरण गरिएको छ । विद्यालय व्यवस्थापन समितिका अध्यक्ष छिरिङ शेर्पाको सभापतित्वमा भएको कार्यक्रममा प्रमुख अतिथी सुनपा १ का वडा सदस्य रोशन बुढाथोकी रहनुभएको थियो भने संस्थाको तर्फबाट महासचिव आशिष् शाहका बुबा राजेन कुमार शाहको उपस्थिती रहेको थियो । कार्यक्रममा पुर्व प्र.अ याम बहादुर शाह,भोज बहादुर कटुवाल लगायत समाजसेवी बुद्दिजिविहरु साथै अभिभावकहरुको समेत उपस्थिती रहेको थियो । विद्यालयका प्र अ निर्मल कटुवालले स्वागत मन्तव्य राख्नुभएको थियो भने कार्यक्रमको संञ्चालन राम तामाङले गर्नुभएको थियो ।
न्यू भिजन ग्रुपको पहिलो चरणको कार्यक्रम सम्पन्न भए पनि यस्तै अन्य २ जिल्लाहरुमा पनि शैक्षिक सामाग्री वितरण गर्न लागिएको संस्थाका अध्यक्ष जीवन शर्माले जानकारी दिनुभयो ।
