नेपाल कम्युनिस्ट पार्टी (माओवादी केन्द्र) निकट जेनजी रेड फोर्स दक्षिण कोरिया ले आफ्नो संगठनात्मक र नाममा महत्वपूर्ण परिवर्तन गर्दै अब ‘प्रवासी युवा एकता मञ्च दक्षिण कोरिया’ नामबाट विधिवत् रूपमा गतिविधि सञ्चालन गर्ने घोषणा गरेको छ।
संगठनले सामाजिक, नैतिक, राजनीतिक तथा प्रशासनिक क्षेत्रमा कोरियाली समाजलाई कुनै पनि प्रकारको बाधा वा नकारात्मक प्रभाव नपर्नेगरी स्वस्थ, उत्तरदायी र सकारात्मक गतिविधि मात्र सञ्चालन गर्ने प्रतिबद्धता सार्वजनिक गरेको छ।
संगठनले आफ्नो पहिचान परिमार्जन गर्दै यसरी तीन मुख्य आधारलाई प्राथमिकता दिएको छ—
• झण्डा : देशको प्रतीक
• झोला : जिम्मेवारीको बोझ
• सिद्धान्त–विचार : विकासवाद र समाजवाद
संगठनका अनुसार, “आम प्रगतिशील परिवर्तनको चाहना राख्ने, विकासप्रेमी सोच भएका तथा सबल राजनीतिक चेतना बोकेका सम्पूर्ण नेपाली युवा वर्गलाई संगठित हुन आह्वान” गरिएको छ।
‘प्रवासी युवा एकता मञ्च’ को मुख्य उद्देश्य कोरियामा रहेका नेपाली युवाबीच राजनीतिक, आर्थिक र नैतिक चेतनाको विकास, तथा सद्भावपूर्ण सिकाइ–अभ्यास प्रवर्द्धन गर्नु रहेको छ।
संगठनले आगामी दिनमा यहाँका नेपाली संघ–संस्था, राजनीतिक निकट समूह, NRNA कोरियालाई, साथै नेपाली दूतावाससँग समन्वय र सहकार्य गर्दै अघि बढ्ने उल्लेख गरेको छ। यसअघि केही दिनअघि मात्रै कोरियामा माओवादी निकट युवाहरूले ‘जेनजी रेड फोर्स’ नाममा नयाँ संगठन गठन गरेका थिए। कोरियामा गठन भएको संरचनाको संयोजक मोहन धमला र नेपालतर्फको केन्द्रीय समन्वयक स्मृति तिमिल्सिना रहेका थिए। संगठनले युवा–राजनीति, राष्ट्रवाद, पार्टीभित्रको गुटबन्दी अन्त्य तथा राष्ट्रस्वाभिमान मजबुत बनाउने लक्ष्य लिएको थियो।
