गत नोभेम्बर ७ तारिकका दिन आत्महत्याको प्रयास पश्चात उपचारका लागि तत्काल अस्पताल पुर्याइएको दोङ ए विश्वविद्यालय बुसानमा अध्यनरत नेपाली विद्यार्थी रोशन बहादुर पख्रिनको उपचारको क्रममा २०२५ नोभेम्बर १० तारिक मृत्यु भएपछि उनको उपचार खर्च र शव नेपाल पठाउन लागेको खर्चमा सहयोग गर्न नेपाल विद्यार्थी समाज, दक्षिण कोरिया (SONSIK) र अन्य संघ–संस्थाले सहयोग अभियान सञ्चालन गरी आवश्यक रकम सङ्कलन गरेको छ।
उनको उपचार खर्च र शवको नेपाल सम्म पुर्याउनको लागि SONSIK ले नोभेम्बर ११ देखि नोभेम्बर १५ सम्म आन्तरिक तथा सार्वजनिक आर्थिक सङ्कलन अभियान चलाएको थियो। अभियानमार्फत कोरियामा अवस्थित विभिन्न संघसंस्था, विद्यार्थी समूह र समुदायले सक्रिय सहभागिता जनाउँदै कुल 18,176,322 कोरियन वोन सङ्कलन भएको जनाएको छ।
SONSIK द्वारा सार्वजनिक गरिएको विवरण अनुसार:
• कुल सङ्कलन: ₩18,176,322
• हस्पिटल बिल र सम्बन्धित खर्च (Hospital bill inklusive mortuary charge): ₩7,536,240
• शव प्रत्यावर्तन शुल्क (Body repatriation charge): ₩6,100,000
• कुल खर्च (Hospital + Repatriation आदि): ₩13,636,240
• बाँकी रकम: ₩4,540,082 — जुन दिवंगत पख्रिनको परिवारलाई हस्तान्तरण गरिने निर्णय गरिएको छ।
ठूला योगदानकर्ताहरु (SONSIK को प्रकाशित सूचीअनुसार)
• नेपाल तामाङ घेदुङ दक्षिण कोरिया र सम्बन्धित समूह — ₩5,454,433
• Korean Educational Consultancy Association of Nepal (KECAN) — ₩3,000,000
• Nepal Educational Counseling Services Association (NECSA) — ₩2,040,000
• अन्य: NRNA NCC Korea, NRNA Korea 10th EC, MRR Korea, Ulsan College Nepali Students, BUFS Community, Jeju Nepali Community तथा हजारौं विद्यार्थी र शुभेच्छुकहरुले पनि योगदान प्रदान गरे।
SONSIK का पदाधिकारीहरूले सार्वजनिक विज्ञप्ति मार्फत सबै सहयोग र योगदानप्रति गहिरो आभार व्यक्त गरेका छन् र आर्थिक सङ्कलन तथा खर्चको पूर्ण पारदर्शिता सुनिश्चित गरिएको बताएका छन्। सो संस्थाले बाँकी रहेको रकम पख्रिन परिवारलाई हस्तान्तरण गर्ने निर्णय गरिसकेको र हस्तान्तरण प्रक्रियामा परिवारसहित समन्वय भइरहेकाले निकट भविष्यमै औपचारिक रूपमा रकम उपलब्ध गराइने जनाएको छ।
पर्याप्त पारदर्शिता देखाउने उद्देश्यले SONSIK ले सबै विवरण आफ्नो आधिकारिक फेसबुक पेज बाट सार्वजनिक गरेको रहेको र यदि कुनै त्रुटि वा सुझाव भए संस्थालाई जानकारी गराउन अनुरोध गरेको छ।
