नेपाल तामाङ घेदुङ ख्यङ्साङ, बुसान शाखाका आयोजनामा महिला शेल्टर “नाना आङा धिम” लाई सहयोग गर्ने उद्धेश्यले नेपाली कथानक चलचित्र ‘माइतीघर’ को विशेष प्रर्दशन आउँदो ३० नोभेम्बर २०२५ मा किम्हे (가야 대학교 김해) मा आयोजना गरिने भएको छ। कार्यक्रम दिउँसो १:०० बजे सुरु हुनेछ।
फिल्म निर्देशक मिलन तामाङ द्वारा निर्देशित यो चलचित्रले मुख्यतः माइतीघर र छोरीको सम्बन्ध र तामाङ सांस्कृतिक परिवेशलाई केन्द्रमा राखेर कथा प्रस्तुत गरेको बताइएको छ।
चलचित्रमा प्रकाश, उपासना र धीरजका साथै केदार घिमिरे, श्यामाश्री शेर्पा, वराज लामा, बुद्धि तामाङ, रजनी गुरुङ लगायतका कलाकारहरूको अभिनय रहेको छ। फिल्मका लेखक रामशरण पाठक हुन् भने रबिन शेरचन र धिरज तामाङले लगानीकर्ता भई चलचित्र निर्माणमा सहयोग गरेका छन्। कार्यकारी निर्मातामा ईश्वर श्रेष्ठ र निरज कटुवाल रहेका छन् र रोहित अधिकारी प्रस्तोता हुनुहुन्छ।
प्रवेश टिकटको मूल्य २५,००० वोन (KRW) तोकिएको छ र आम दर्शक एवं नेपाली समुदायका सदस्यहरूलाई गरिमामय उपस्थिति र सहयोगका लागि आयोजकले हार्दिक अनुरोध गरेका छन्।
आयोजकले कार्यक्रममा संकलित रकम महिला शेल्टर “नाना आङा धिम” को प्रशासनिक तथा संचालन खर्चका लागि प्रयोग गरिने जानकारी दिएका छन्। थप जानकारी वा टिकट सम्बन्धी विवरणका लागि नजिकको तामाङ घेदुङ बुसान शाखा प्रतिनिधिसँग सम्पर्क गर्न आयोजक अनुरोध गरेको छ।
