नेपाल सरकारका सूचना तथा सञ्चार प्रविधि मन्त्री जगदीश खरेल यही साता दक्षिण कोरियामा ११औँ ग्लोबल आइसिटी लिडरशिप फोरम (11th Global ICT Leadership Forum) मा भाग लिन दक्षिण कोरियाको भ्रमणमा आउँदै हुनुहुन्छ। भ्रमणको क्रममा उहाँसँग ‘नेपाली समुदायको साक्षात्कार कार्यक्रम’ हुने भएको छ।
कोरिया आएको अवसरमा मन्त्री खरेलले कोरियामा बसोबास गर्ने नेपाली सञ्चारकर्मीहरू र समुदायका प्रतिनिधिहरूसँग प्रत्यक्ष भेटवार्ता गर्ने कार्यक्रम रहेको बताइएको छ। यो कार्यक्रम नेपाल पत्रकार महासङ्घ दक्षिण कोरिया शाखाको आयोजनामा यही नोभेम्बर १४, २०२५ (शुक्रबार)बेलुकी ७ बजे, सुवनस्थित साराक एभरेष्ट रेस्टुरेन्ट को सभाहलमा आयोजना हुने तय भएको छ।
महासङ्घका अनुसार, यस साक्षात्कार कार्यक्रमको मुख्य उद्देश्य प्रवासमा रहेका नेपाली पत्रकार र समुदायबीच प्रत्यक्ष संवाद र अन्तरक्रिया बढाउने, अनुभव र विचार साट्ने तथा सूचना र सञ्चार क्षेत्रमा सरकार र प्रवासी नेपालीबीचको सम्बन्ध सुदृढ बनाउने रहेको छ। नेपाल पत्रकार महासंघ दक्षिण कोरिया शाखाले सबै सञ्चारकर्मी र समुदायका सदस्यहरूलाई उक्त कार्यक्रममा सहभागी भई कार्यक्रमको सफलतामा योगदान दिन आह्वान गरेको छ
