बिपिन गुरुङ अध्यक्ष रहेको 𝐍𝐑𝐍 दक्षिण कोरियाले हालै जारी गरेको एक विज्ञप्तिमार्फत दक्षिण कोरियास्थित नेपाली समुदायमा देखिएका विभाजनकारी गतिविधिप्रति गम्भीर असन्तुष्टि व्यक्त गरेको छ।
संघले एनआरएनएको एकता महाधिवेशनलाई नेपाल सरकारको परराष्ट्र मन्त्रालयले आधिकारिक मान्यता प्रदान गरिसकेको स्पष्ट उल्लेख गर्दै, अबको प्राथमिकता संस्था एकीकृत, स्थिर र प्रवासी नेपाली हितमा उन्मुख बनाउनुपर्नेमा जोड दिएको छ।
विज्ञप्तिमा भनिएको छ, “दूतावास र राजदूतज्यू प्रवासी नेपालीका अभिभावक, संयोजक र मार्गदर्शक हुन्। उनीहरूले संस्थागत एकतालाई कमजोर बनाउने र समुदायमा अशान्ति फैलाउने कार्य गर्न नहुने संवैधानिक तथा नैतिक दायित्व रहन्छ।”
बिपिन गुरुङले अध्यक्ष रहेको एनआरएन दक्षिण कोरियाले केही समययता देखिएका व्यवहारले प्रवासी नेपाली समुदायमा गम्भीर निराशा र शंका पैदा गरेको उल्लेख गर्दै दूतावासको भूमिकामाथि प्रश्न उठाएको छ।
“दुर्घटना र मृत्युजस्ता संवेदनशील घटनामा सहयोगको अपेक्षा गरिरहेका प्रवासीहरूलाई बेवास्ता गर्दै संस्थाभित्र विभाजन बढाउने गतिविधिमा संलग्न हुनु गम्भीर विषय हो,” विज्ञप्तिमा भनिएको छ।
संस्थाले यस्ता क्रियाकलापको कडा निन्दा गर्दै दूतावास र राजदूतलाई समुदायको हित, एकता र विश्वास कायम राख्ने संवैधानिक जिम्मेवारीमा पुनः उभिन आग्रह गरेको छ।
